MADRID, 18 Sep. (EUROPA PRESS) -
Como cada añu, l'Academia d'Artes y Ciencies de la Televisión estaunidense reconoz les meyores producciones del añu na gala de los Emmy. Una ceremonia que na so 70ª edición premió a una habitual de los Emmy, 'Xuegu de tronos', y tamién a 'La maraviyosa Sra. Maisel', estrenada l'añu pasáu.
'Xuegu de tronos' foi escoyida Meyor serie dramática, desbancando a la ganadora del añu anterior, 'The Handmaid's Tale', qu'anguaño marchó de vacíu. Per otru llau, 'La maraviyosa Sra. Maisel', sobre un ama de casa que se convierte en comediante al divorciase, llevó'l premiu a Meyor Serie de Comedia.
Tamién llevó'l so premiu a Meyor actriz principal de comedia Rachel Brosnahan, protagonista de 'La maraviyosa Sra. Maisel'. Na mesma categoría fíxose col gallardón Bill Hader pol so papel en 'Barry'.
Yera la última oportunidá de Claire Foy pa facese col premiu a la Meyor actriz principal de drama pol so papel d la reina Isabel II en 'The Crown'. L'actriz ganó a la favorita Elizabeth Moss, protagonista de 'The Handmaid's Tale'. Matthew Rhys fíxose col gallardón pola so interpretación d'un espía rusu na última temporada de 'The Americans'.
Peter Dinklage llevó por tercer vez consecutiva'l Emmy como Meyor actor secundariu de drama, gallardón que foi parar a Thandie Newton, de 'Westworld', na so categoría femenina.
Na categoría de comedia, foron premiaos como actores secundarios Alex Borstein, pol so trabayu en 'La maraviyosa Sra. Maisel', y Henry Winkler, por 'Barry'.
'American Crime Story: L'asesinatu de Gianni Versace' recibió'l Emmy a la meyor miniserie y a meyor actor pa Darren Criss, que competía con Antonio Banderea. Penélope Cruz, Edgar Ramírez y Ricky Martin, tamién nomaos pola miniserie, quedaron coles manes vacíes.
