MIERES, 28 de Xunu (EUROPA PRESS)
La conseyera de Desarrollu Rural y Recursos Naturales del Principáu d'Asturies, María Jesús Álvarez, destacó esti martes en Mieres "les bones mires de futuru" que presenta la producción más emblemática de la rexón al asegurar que la Sidra d'Asturies con Denominación d'Orixe Protexida (DOP) "tien munchu marxe pal crecimientu".
Álvarez realizó estes declaraciones mientres l'actu de presentación de la collecha del 2015, onde esplicó que de los 2.809.333 llitros de sidra DOP ellaboraos l'añu pasáu, apurriéronse 1.738.000 contraetiquetes, lo qu'implica que más d'un millón de llitros nun van dir identificaos como talos, señalaron dende la Conseyería nuna nota.
Los quilos de mazana producíos pa la DOP aumentaron dende los 2,4 millones del 2009 hasta los 3,77 millones del 2015, mientres que los productores pasaron de 260 a 272 y les hectárees de cultivu, de 530 a 585.
La conseyera destacó que la DOP sigue creciendo lo mesmo en producción como n'hectárees y en llitros, y añadió que la conseyería va siguir apoyando al sector, ente otres actuaciones, al traviés de les ayudes al conseyu regulador pa que lleven a cabu tanto'l trabayu de certificación y control como'l de promoción.
Álvarez tamién anunció mientres l'actu que la Conseyería de Desarrollu Rural va sovencionar esti añu al conseyu con 176.225 euros, 41.500 más que nel 2015, de los que 107.000 van ser pa gastos de control del productu y 68.560 pa promoción.
"El nuesu compromisu de futuru ye claru pa que la producción propio de la mazana y la ellaboración de la sidra puea consolidase, fundamentalmente al traviés de la DOP, y puea abrir mercaos nel restu d'España y nel esterior" aseguró Álvarez.
La Conseyería, amás de formar parte del conseyu regulador, collabora na investigación al traviés del Serviciu Rexonal d'Investigación y Desarrollu Agroalimentariu (Serida) y ta zarrando un grupu de trabayu col fin d'identificar variedaes locales de mazana qu'apurran meyores cualidaes.
