Más de 100 operarios del Principáu puen vese na cai tres recalificase una oposición fecha nel 2006, según sindicatos

UVIÉU, 02 de Xineru (EUROPA PRESS)

Los sindicatos asturianos aconceyáronse güei pa defender la situación de 112 operarios de l'Alministración que puen vese na cai afeutaos por una sentencia qu'anula cuatro entrugues del segundu exerciciu d'un procesu selectivu realizáu nel 2006, según esplicó ante los medios Patricia Jove Gómez, una de les persones afeutaes pola situación.

Nesti momentu, el tribunal de selección ta procediendo a la recalificación del segundu exerciciu, lo que va facer qu'haya nuevos aprobaos que van tener opción a examinase del tercer y últimu exerciciu, informaron los sindicatos.

"Tolos nuevos aprobaos que superen en nota a los que yá s'examinaron nel so día van ser propuestos pol Institutu Asturianu d'Alministración Pública pa la formalización del contratu", esplicó Patricia Jove. "El tribunal nun pue proponer más aprobaos que'l númberu de places convocaes, polo que la intención de l'Alministración ye cesar a tantos como seya necesario pa dar cumplimientu a la sentencia", añadió.

Los afeutaos xunto colos sindicatos van movilizase pola defensa de toos y caún de los puestos de trabayu, esplicó Patricia Jove. "La xente tomó posesión hai yá más de dos años y agora vense nuna situación n'onde nun tienen garantizáu'l sopuestu de trabayu", añadió.

"Hai xente que dexó trabayos anteriores pa optar a un puestu fixu y qu'agora puen vese na cai", declaró l'afeutada. "En dos años la xente tuvo fíos, compró pisos y agora pue vese na cai indefensos", añadió.

Los sindicatos xunto cola plataforma d'afeutaos opónense a que se cese a cualquier persona de les que nel so día sacó la oposición. "La decisión nun se mos comunicó, tou plazu ta agotáu y nun mos dexen formar parte", esplicó Patricia Jove. "Comprometiéronse a comunicamos la recalificación y tamos esperando por ella o por que se mos comuniquen les cesiones", añadió.