UVIÉU, 22 Feb. (EUROPA PRESS) -
Más de 4.500 persones movilizáronse esti xueves n'Uviéu pa reclamar pensiones dignes y cargar contra la xubida del 0,25 por cientu d'anguaño. Les asociaciones de pensionistes d'Asturies y Xixón (APA y APG) foron les convocantes d'esta marcha qu'axuntó a numberosos pensionistes asturianos indignaos colos recortes na prestación.
El presidente d'APA, Pepe Fuentes, apuntó al empiezu de la manifestación con una reivindicación que pasa por que les pensiones xuban conforme al IPC y por una reforma de la Constitución pa "blindar" les pensiones y evitar asina que "el gobiernu de turnu" pueda perxudicar al colectivu. Reclamaron amás que'l Gobiernu devuelva a los pensionistes tolo "debío" de los años anteriores nos que les xubíes foron inferiores al IPC.
Per otru llau, el presidente de l'Asociación de Pensionistes de Xixón, Boni Arias, calificó de "miseria" la xubida del 0,25 por cientu. "Güei vamos depositar les cartes nun retrete", aseguró. Arias defendió amás una medría del salariu mínimu y de la pensión mínima hasta los 1.080 euros al mes.
Los recortes nes pensiones empezaron en 2011 cuando'l Gobiernu del PSOE "conxelóles", según Arias. La situación, dixo, agravóse con "los recortes" del PP. "Nun vamos aparar hasta consiguir lo que tenemos en mente", señaló, afirmando que les concentraciones van siguir.
Dende la Estación de tren de la capital del Principáu, los pensionistes y manifestantes foron hasta l'Institutu Nacional de la Seguridá Social na redolada de la Plaza d'América, pidiendo tamién a los mozos que se sumen a estes reivindicaciones en vez de quedar en casa". "Parez que nun va con ellos y son los más interesaos, el día que falten pá y ma van alcordase", dixo ún de los manifestantes.
