MADRID, 25 de Febreru (EUROPA PRESS)
Polo menos siete cráteres misteriosos descubriéronse nes llendes ártiques de Siberia, anque les imaxes de satélite planteguen que pue haber hasta 20.
El descubrimientu de los trés primeros l'añu pasáu causó gran espectación, dao que naide tenía idea de cómo se produxeren. Entós, un equipu d'investigadores examinó l'interior d'unu de los cráteres pa esclarar la so naturaleza.
Esa espedición nun reveló datos concretos, pero la mayoría de los xeólogos abarrunten agora que los cráteres surdieron pol calentamientu en Siberia, lo que lleva a la fusión del permafrost, y a que gases soterraños rellenen cuévanos soterraños que, a lo último, esploten, y causen la creación de los cráteres.
Amás d'aldericar sobre la causa de la creación de los cráteres, l'alderique tamién empezó sobre'l términu usáu pa describilos, dao que la palabra cráter vincúlase xeneralmente con esplosiones de superficie o hasta más de contino colos choques ente cuerpos celestes. Por esa razón, munchos investigadores empezaron a referise a los cráteres como embudos.
La investigación ta dirixéndola Vasily Bogoyavlensky-profesor afiliáu a l'Academia de Ciencies de Rusia. Nuna entrevista con Siberian Times indicó qu'él cree qu'hai munchos más cráteres en y alredor de les penínsules de Yamal (lliteralmente'l fin del mundu' en llingua local) y Taimyr, y paez probable que nel futuru puean presentar un peligru pa la salú.
Nesti sen, esplicó que los residentes d'un pueblu cercanu observaron l'apaición d'unu de los cráteres, dende la distancia, y dicen que vieron un rellumu y sintieron tremecer la tierra.
Bogoyavlensky tamién dixo qu'él cree que munchos de los pequeños llagos de la zona probablemente produxéronse pol mesmu procesu que los cráteres. Añadió que nun sitiu, un gran cráter paez tar arrodiáu de dellos cráteres pequeños y semeyes de satélite demostraron la esistencia de pingos (montículos que se desarrollen na superficie por cuenta de la fusión del xelu y fíltrense pa dempués volver conxelase) nos llugares onde se formaron los cráteres más tarde, lo que plantega un vínculu.
