BARCELONA, 4 de Setiembre (EUROPA PRESS)
El presidente de la Generalitat, Artur Mas, esplicó esti vienres que namás contemplaría abandonar si la candidatura Junts pel sí pierde les elecciones del 27S y nun pue articular una mayoría que faiga posible tirar alantre un Gobiernu.
Nuna entrevista a Onda Cero recoyida por Europa Press, aseguró que pue ganales sin mayoría absoluta, polo que d'entrada nun cree que tenga que dexalo si sáca-y "trés veces" escaños al segundu anque nun tenga mayoría.
En casu de ganar, esclaró que pa la investidura otra vuelta como presidente de la Generalitat precisa mayoría absoluta na primer votación, y simple nuna votación posterior, polo que nun necesariamente diba requerir apoyu de la CUP
En repitiendo que'l 27S va facese un recuentu de los diputaos del 'sí' y del 'non', concretó que van siguir alantre col procesu soberanista anque les candidatures que nun tán pola independencia llogren más votos nos comicios. "Sí, porque voi tener mayoría de diputaos. Oblíguennos a contar diputaos anque yo prefiero contar votos, pero entós ¿por qué nun me dexen facer una consulta normal?", insistió.
INTERROGANTES
Pa Mas, la independencia tien interrogantes ya rocees más que contraindicaciones nel ámbitu económicu-empresarial, sobre si Cataluña queda na UE, sobre si pagarán les pensiones, sobre cómo van quedar los derechos llingüísticos y cuestiones como la nacionalidá, pero "toos tienen respuesta".
Sobre la cuestión económica col restu d'España, almitió que nun pue asegurar que nun va quedar afectada en nada, pero avisó que diba ser "de tontos" mancase mutuamente namás porque los catalanes aspiren a tener un Estáu propiu.
En relación a la pertenencia a la UE, insistió en que nengún tratáu européu contempla qu'una Cataluña independiente quedara fuera d'esti marcu: "a daquién que nun ta dientro puédese nun almitilo, pero a daquién que yá lo ta hai qu'echalo. Los sos ciudadanos tienen unos derechos alquiríos".
Amás de repitir que nun Estáu catalán va haber más garantía de cobrar la pensión, garantizó que los derechos llingüísticos de catalanes y de los que tienen un orixe español van caltenese "exactamente igual", y que, anque la nacionalidá que s'establecería sería la catalana, el que quiera podría facela compatible cola española o siguir viviendo en Catalunya como país de la UE si namás quisiera caltener ésta última.
