Mediu millón de fíos y nietos d'exiliaos van poder solicitar la nacionalidá española de magar güei

UVIÉU, 29 d'Avientu (EUROPA PRESS)

Más de mediu millón de persones de tol mundu, según los cálculos de les asociaciones, van poder solicitar la nacionalidá española de magar güei, tres la entrada en vixencia'l sábadu de la instrucción del Ministeriu de Xusticia que reconoz esti derechu a los fíos y nietos de los exiliaos demientres el franquismu, dando cumplimientu a la Llei de memoria Histórica.

Según esplicó en declaraciones a Europa Press, el director xeneral d'Emigración del Ministeriu de Trabayu y Inmigración, Agustín Torres, la midida va afeutar sobre too a tres grupos de ciudadanos: los fíos d'españoles emigraos o exiliaos, los nietos de los mesmos y los españoles qu'algamaron la nacionalidá na reforma del añu 2002.

Estos últimos gocen d'una nacionalidá "de menor calidá", en pallabres de Torres, porque anque se los considere españoles, nun tienen reconocida la nacionalidá d'orixe, polo que nun la puen tresmitir a los sos fíos adultos. De magar esti llunes, toes eses persones van poder solicitar un cambiu d'estatutos.

De la mesma manera, los fíos d'españoles van poder algamar la nacionalidá d'orixe anque naciere n'otru país, con inpendencia de la so edá y al marxe del llugar de nacimientu de los padres. Hasta agora, la nacionalidá sólo se tresmitía si'l padre o la madre yeren nativos d'España y si los fíos yeren menores de 18 años.

A lo último, la instrucción qu'entra en vixencia'l día 27 contempla que los nietos d'españoles emigraos ente'l 18 de xunetu de 1936 y la Llei d'Aministía aprobada tres el franquismu (ochobre de 1977), "en función de les circunstancies", van poder algamar la nacionalidá d'orixe, siempre qu'acrediten la so descendencia.

Los nietos de los que s'exiliaron ente'l 18 de xunetu de 1936 y el 31 d'avientu de 1955 sólo van taner qu'acreditar que'l so güelu o güela d'orixe español abandonó'l país y ingresó n'otru. Per contra, los nietos de los que colaron ente 1955 y la citada Llei d'Amnistía van tener que presentar amás, dalgún certificáu oficial del que s'entienda que'l so pariente trabayó nel país de destín pa "ayudar a los españoles que diben llegando", esplicó Torres.

Si bien, ente'l 55 y el 77 fueron munchos los españoles qu'emigraron por motivos económicos a otros países, especialmente del entornu européu na década de los sesenta, Torres esplica que la iniciativa nun va dirixida a esti colectivu en particular, dao qu'estos tresllaos "nun suponíen una perda de nacionalidá", como sí pasaba en munchos países llatinoamericanos.

REIVINDICACIÓN HISTÓRICA

Pal responsable d'Emigración, la clave de la midida ye que busca "amenorgar los efeutos de la dictadura franquista n'España", y dar respuesta a una "reivindicación histórica" de los descendientes d'españoles, principalmente de los que residen en Llatinoamérica. Amás, d'una "compensación", van algamar un pasaporte español, y poro la Unión Europea, y la posibilidá de beneficiase de les ayudes estatales contemplaes pa ciudadanos nel esterior.

Sicasí, Torres señaló que viaxar a Europa nun ye la prioridá d'estes persones, o polo menos nun ye esto lo que treslladaron al Gobiernu les asociaciones que los representen. "Nun ye la xeneralidá, porque son persones mui integraes nos sos países que lo que busquen ye una reconocencia, una compensación, porque nunca se-yos diere la opción", añadió.

Los beneficiarios van poder algamar información sobre los trámites y requisitos nes páxines web de los ministerios españoles d'Asuntos Esteriores y Cooperación, Trabayu y Información y Xusticia, asina como nes representaciones consulares, onde va haber folletos informativos disponibles. El plazu pa solicitar la nacionalidá va prollongase dos años con posibilidá d'otra prollongación adicional, según la instrucción aprobada pol Conseyu de Ministros.