UVIÉU, 19 Feb. (EUROPA PRESS) -
La portavoz del PP y presidenta del partíu, Mercedes Fernández, pidió esti llunes al Gobiernu de Javier Fernández que vuelva a intentar "bien ceo y con cordura" qu'Asturies disponga de presupuestos y por eso encamentó-y a presentar un proyectu nuevu.
La propuesta del PP nun foi bien recibida pol restu de grupos parllamentarios, que coincidieron en qu'agora lo necesario ye que l'Executivu asturianu presente lo enantes posible la Llei de Creitu estraordinariu.
A xuiciu de la portavoz del PP sería una oportunidá'l poder sacar alantre, al empar que los presupuestos xenerales del Estáu, los presupuestos autonómicos, polo qu'aportunó en que n'Asturies el PP "sigue cola mano tendida" y ta dispuestu a alcordar eses cuentes sobre la base de los anteriores y incorporando dalguna adicción" del so partíu.
"Tamos en disposición d'abrir una negociación pa qu'Asturies pueda tener presupuestos, coincidiendo o non cola aprobación de los presupuestos estatales", dixo Mercedes Fernández, qu'aportunó en que ye posible aprobar les cuentes que sería "muncho más útil qu'un creitu estraordinariu que nun dexa de ser un parche".
Fernández dixo que l'alcuerdu presupuestariu col consensu del PP ye numbéricamente posible. "Qu'un gobiernu nun quiera tener un presupuestu pudiendo tenelo yo nun lo vi nunca", manifestó la presidenta de los 'populares' asturianos que culpó a la FSA de que'l proyectu presupuestariu nun saliera alantre. "Creo que la FSA fracasó con rotundidá", indicó Fernández que llamentó que tuviéramos énte un gobiernu interveníu".
"UNA CHANCIA DE MAL GUSTU", SEGÚN IX
Ún de los grupos más críticos cola propuesta del PP foi IX. El so parlamentariu, Gaspar Llamazares, considerólo "una chancia de mal gustu". "Montoro diz que nun va presentar los presupuestos d'anguaño y que probablemente nun presente los del siguiente y el PP n'Asturies pide que se presenten otra vez los presupuestos que refugó, bono, yo creo que chancies les xustes", dixo Llamazares.
Asina, pa Llamazares lo qu'hai que facer ye encamentar al Executivu estatal a que desbloquie la financiación autonómica y sobremanera los adelantos a cuenta, porque ensin eso nun habrá una situación presupuestaria bona, pero falar agora de volver presentar los presupuestos polos que votaron en contra-y parez "una chancia de mal gustu".
Per otru llau, el portavoz de Podemos, Emilio León, indicó que'l so grupu nun entiende por qué Mercedes Fernández ta disgustada si los presupuestos prorrogaos son los que'l PP apautó cola FSA.
Indicó que hasta agora el Gobiernu "lo único que ta faciendo ye actuar por inercia dexando pasar el tiempu ensin facer nada" y añadió qu'a Podemos esmolez-y que tea utilizándose la falta de presupuestos como campaña pa xustificar les coses que nun funcionen na rexón y pa culpabilizar d'ello al restu de fuercies parllamentaries.
Dende Ciudadanos, Nicanor García, tamién encamentó al Gobiernu a presentar la Llei de creitu estraordinariu na Cámara de manera urxente.
Nesi sentíu, el portavoz de PSOE, Marcelino Marcos Líndez, indicó que'l gobiernu y la mesma conseyera de Facienda treslladaron qu'a lo llargo del mes de febreru presentaríense y "tamos nesi plazu".
