MADRID, 22 d'Ochobre (EUROPA PRESS)
La presidenta del Partíu Popular d'Asturies, Mercedes Fernández, condenó esti miércoles el comportamientu "reprochable" de los que, como conseyeros de Caja Madrid, utilizaron 'tarxetes B', anque dixo nun saber cómo van afectar al PP nes próximes elecciones ésti y otros escándalos que llevaron a los tribunales a dellos miembros del partíu.
"Paezme mal. Preferiría que nun pasaren toes eses situaciones y toes eses actuaciones xudiciales consecuencia de comportamientos qu'a mi paécenme reprochables", dixo sobre esos escándalos, tres reunise cola ministra d'Agricultura, Alimentación y Mediu Ambiente, Isabel García Tejerina, na sede del Ministeriu en Madrid.
Al referise concretamente al casu de les tarxetes opaques al fiscu axudicaes a 86 conseyeros y directivos de Caja Madrid y Bankia, Fernández declaró a los periodistes qu'estes persones tuvieron un comportamientu que "nun almite matices". "Condenólos la sociedá y yo condénolos igual", añadió.
En cuanto al costu electoral pal PP, Fernández dixo que nun se pue predicir lo que va pasar nes elecciones municipales y autonómiques del 2015 porque "nestos tiempos de tantos cambios, convulsiones y novedaes", la opinión de los electores "muévese con una rapidez".
