Migoya defende la xestión d'Areces y retruca a Ovidio Sánchez que'l "fracasáu" políticu ye él

XIXÓN, 9 de Febreru (EUROPA PRESS)

La conseyera d'Alministraciones Públiques, Ana Rosa Migoya, tachó güei de "fracasáu" dende'l puntu de vista políticu al presidente rexonal del PP n'Asturies, Ovidio Sánchez, al tiempu que defendió la xestión desarrollada polos socesivos gobiernos de Vicentes Álvarez Areces, que conllevaron el qu'Asturies seya una rexón "más moderna".

Asina lo dixo en Xixón a los periodistes tres participar nos actos de celebración del Día d'Internet Seguru nel Acuariu, en respuesta a les crítiques de Sánchez, qu'atribuyó'l cambiu de candidatu del PSOE nes próximes elecciones autonómiques a la difícil situación que vive la rexón p oles polítiques d'Areces. Migoya insistió en que Sánchez "fracasó siempre en tolos sos oxetivos dende'l puntu de vista políticu".

Na so opinión, lo que'l cabezaleru 'popular' trata de facer ye "confundir". A la escontra, aseguró que'l Principáu tien "mui clara" la so actuación nun contestu de crisis y añadió que'l Gobiernu rexonal aplicó mecanismos y midíes pa responder a la situación y amenorgar los efectos más negativos xeneraos pola mesma "dientro de les capacidaes d'un gobiernu".

Nesti sen, matizó que los datos económicos apunten a que les coses se ficieron bien y qu'esta comunidá yá nun tien los problemes d'enantia, qu'amás yeren "de mui difícil superación". "Ye más moderna, meyor preparada, con más posibilidaes pa poder superar les dificultaes", afirmó.