Miguel Rodríguez Monteavaro gana'l premiu de relatos cortos en gallego-asturianu que convoca Xeira

UVIÉU, 08 de Febreru (EUROPA PRESS)

Miguel Rodríguez Monteavaro, escritor de Bual, ye'l ganador del XIX Premiu Xeira de 'narracióis curtias' por so relatu 'Amazonas', según informó la entidá organizadora al traviés d'una nota prensa a la que tuvo accesu Europa Press. El premiu va entregase esti próximu sábadu, día 13 de febreru, na Casa La Cultura de Bual.

Nel actu d'entrega tamién habrá una actuación musical a cargu del grupu de folk Moxega y la presentación en sociedá del discu 'Versióis eonaviegas', compuestu por cuatro cantares del últimu discu del grupu Dixebra, 'Amor incendiariu', grabaes na fala del occidente d'Asturies.

El premiu, que según el colectivu creóse pa promocionar l'usu lliterariu del gallego-asturianu y ayudar asina a la so normalización social, "tien una dotación de 600 euros". El xuráu quixo tamién facer una reconocencia especial pa la calidá del cuentu 'Pequena', de Moisés Cima, natural de Mouguías, nel conceyu de Cuaña.

Ente los premiaos n'ediciones anteriores, recuerden los organizadores, que figuren los nomes de la mayor parte de los autores de llibros en gallego-asturianu nos últimos años: como son Manolo Galano, Jacinto Díaz, Alejandro Antúñez, Fredo de Carbexe, Rafael Cascudo, Xaviel Vilareyo, María José Fraga, Aurora García Rivas o Marisa López Diz.