Miles de camboyanos celebren el 30 aniversariu de la cayida del réxime de Pol Pot

PHNOM PENH, 7 de Xineru (Reuters/EP)

Miles de sobreviventes de los denominaos 'campos de la muerte' de los Xemeres Roxos camboyanos celebraron güei'l 30 aniversariu de la cayida del réxime de Pol Pot, qu'en cuatro años causó la muerte de casi dos millones de persones por mor de les purgues polítiques, les enfermedaes y la fame.

Hasta 80.000 camboyanos se concentraron nel estadiu olímpicu de la capital, Phnom Penh, dende onde entamaron una marcha organizada pol Partíu del Pueblu de Camboya (PPC), herederu del gobiernu instaláu en Camboya dempués de la invasión de Vietnam, el 7 de xineru de 1979.

"Siempre recordamos a aquellos que sacrificaron les sos vides pa salvamos del xenocidiu", señaló'l presidente del partíu y ex cabezaleru guerrilleru Chea Sim ante la xente.

Estes celebraciones tuvieron marcaes pola polémica surdida de magar el refugu de los partíos de la oposición a sumase a los actos. Pese al refugu internacional al réxime de los Xemeres Roxos, una minoría significativa de camboyanos tamién consideren el 7 de xineru como l'entamu de los diez años d'ocupación de Vietnam.

Los rivales políticos del primer ministru camboyanu, Hun Sen, antiguu comandante xemer que tomó'l poder tres la retirada de les tropes vietnamites lu consideren una marioneta del Gobiernu vietnamita, denuncia qu'él siempre negó .

"Cualquiera que tea a la escontra del Día de la Victoria ye Pol Pot o un animal", manifestó Hun Sen ante la xente, nun puente nel sur de Phnom Penh, pa festexar el 30 aniversariu del fin de la "era Pol Pot" cola entrada de les tropes vietnamites.

Declaráu como 'Día de la Victoria' pol Gobiernu, los partíos de la oposición consideren l'aniversariu como l'entamu de la dominación vietnamita y denunciaron l'apropiación de los actos per parte del PPC.

TRIBUNAL INTERNACIONAL

Demientres los cuatro años que duró'l réxime de los Xemeres Roxos (dende abril de 1975 a ochobre de 1979) les sos aiciones y maneres d'imponer la so política conduxeron a lo que se conoz como'l "xenocidiu camboyanu", actos que, nesti momentu, tán xulgándose como crimes escontra la Humanidá por un tribunal internacional en Phnom Penh y apoyáu pola ONU.

Dempués de la cayida d'esti réxime lideráu por Pol Pot, los Xemeres Roxos tornaron al so escondite na selva. Tres resistir los ataques de los vietnamites primero y del Gobiernu de Hun Sen dempués, finalmente se rindieron en 1998, el mesmu añu que morrió Pol Pot.

Cinco de los responsables del réxime fueron deteníos y van xulgalos esti añu nel tribunal internacional. "Los espíritus de los mios familiares nun van tener paz si nun se xulga a esos asesinos", esplica un camboyanu que perdió a ocho seres queríos demientres los cuatro años de réxime xemer.

Los deteníos son el llamáu 'hermanu númberu dos, Nuon Chea --mano derecha de Pol Pot--, l'ex presidente Khieu Samphan, l'ex ministru d'Esteriores Len Sary, la muyer d'ésti y ex ministra d'Asuntos Sociales Leng Thirith, y Duch, ex responsable del centru d'interrogatorios y tortures S-21. Toos ellos s'enfrenten a la cadena perpetua si son declaraos culpables.