La manifestación axunta a 30.000 persones según la organización, mentes que la Policía Local cifra 5.000
UVIÉU, 23 Abr. (EUROPA PRESS) -
Miles de persones diéronse cita esti sábadu n'Uviéu en defensa de la oficialidá del asturianu. Nun ambiente festivu, multitú de families con neños participaron nesta movilización qu'empezó na estación del Norte y remató na Plaza de la Catedral. La organización de la manifestación cifró en 30.000 los asistentes, mentes que la Policía Local valoró la presencia nunos 5.000.
Ente conseñes como "yá, yá, yá, oficialidá", o "l'asturianu, llingua oficial", los asistentes enllenaron la Cai Uría coles sos reivindicaciones, que pasen per modificar l'Estatutu d'Autonomía del Principáu d'Asturies pa incluyir nél l'asturianu como llingua oficial.
El portavoz de la Xunta Pola Defensa de la llingua asturiana, Xosé Candel, destacó énte los medios de comunicación la "pluralidá" cola que cuenta l'apoyu a la oficialidá, y señaló que la reforma del estatutu d'autonomía "pue facese yá". "Ye'l momentu", dixo, de que'l parllamentu asturianu trate la oficialidá.
Mostróse satisfechu pol éxitu de la convocatoria, señalando que nos últimos díes la Xunta percibió "un montón d'apoyos" de persones de tolos ámbitos, tanto políticos como sociales, culturales o deportivos.
A la manifestación foron representantes de les principales organizaciones sindicales d'Asturies, amás de representantes de la Federación Socialista Asturiana (FSA-PSOE), Izquierda Xunida y Podemos.
Na concentración tamién se reivindicó la oficialidá del gallego-asturianu pa la zona del Eo y el Navia, y cuntó col apoyu d'otres asociaciones como Reciella-Families pol Asturianu, Iniciativa pol Asturianu y Plataforma pola Oficialidá del Gallego-asturianu, amás d'otres entidaes del ámbitu social y cultural asturianu.
Dos bandes de gaites amenizaron la marcha, amás d'un grupu con más d'un centenar de panderetes, una batucada y un soundsystem. Depués la llectura del manifiestu, celebróse un conciertu na Plaza de la Catedral onde participaron Ún de Grau y L-R (postfolk).
RESPALDU POLÍTICU
La secretaria d'organización de la FSA-PSOE, Gimena Llamedo, recordó na manifestación que los socialistes asturianos aprobaron nel últimu congresu "el camín" hacia la oficialidá, dalgo que los socialistes van tratar na llexislatura próxima. Llamedo punxo en valir qu'esta ye la primer vez qu'una representación oficial de la FSA participa nesta manifestación, y apoyó la posición del gobiernu asturianu de cumplir col so programa electoral y nun defender la oficialidá nesta llexislatura.
Per otru llau, el coordinador xeneral d'IX n'Asturies, Ramón Argüelles, señaló que la oficialidá del asturianu "nun ye una llucha contra'l castellanu". "Nun tenemos esi tipu de problemes de convivencia, respetamos el castellanu pero nos parez que l'asturianu ye un patrimoniu qu'hai que protexer, ensin enfrentar a naide", señaló.
Dende Podemos, el secretariu xeneral Daniel Ripa señaló que la oficialidá "ye de sentíu común", pa que nun haya persones "discriminaes por falar la llingua que falen". La movilización de güei marca pa Podemos "un puntu d'inflexón" na defensa de la oficialidá del asturianu, una llingua que ta "nuna situación dramática". Énte esta situación, señaló que l'asturianu tien que recibir apoyos que se reflexen n'iniciatives polítiques.
