Miliband diz que si EE.UU y Reinu Uníu nun invadieren Iraq, l'autoridá de la ONU veríase reducida

REUTERS

LONDRES, 8 de Marzu (EUROPA PRESS)

El ministru d'Asuntos Esteriores británicu, David Miliband, afirmó que "si nel 2003 Reinu Uníu y Estaos Uníos nun respondieren militarmente a les amenaces del dirixente iraquí, Sadam Husein, esa decisión menospreciaría seriamente l'autoridá de la ONU".

Mientres la so intervención ante la investigación pente medies de la que s'intenta determinar por qué participó Reinu Uníu na guerra d'Iraq, Miliband tamién dixo qu'el so país "nun tendría d'estrayer una lleición equivocada d'esti conflictu pese al baruyu internacional que causó".

"La lleición equivocada sería que Reinu Uníu tendría d'arrenunciar a comprometese a nivel internacional con otros", indicó. "Nun tenemos de ser un país que da la espalda al mundu, porque si lo faemos vamos ser muncho más probes, en tolos sentíos de la palabra", alvirtió.

Cuando se produxo la invasión d'Iraq nel 2003, Miliband yera viceministru d'Educación, y nun se punxo al frente del Ministeriu d'Esteriores hasta xunu de 2007, cuando Gordon Brown convirtióse en primer ministru.

El testimoniu del ministru centróse na entrega de la ciudá de Basora y del sur d'Iraq a les fuerces de seguridá iraquines y en cómo se llevó a cabu esti procesu, pero antes preguntáron-y por qué sofitó la guerra, daes les esplicaciones abondo distintes qu'escuchó la Comisión presidida por John Chilcot mientres les comparecencies de Brown y del so predecesor nel cargu Tony Blair.

"Nun veo la contradicción qu'ustedes describieron", respondió'l xefe de la Diplomacia británica. Voté a favor de la guerra porque creo que'l desafíu que fizo Sadam a la ONU yera en sí un peligru pa la paz y la seguridá internacionales, y había que caltener l'autoridá de la ONU", sorrayó.

Miliband aseguró que "toles axencies d'intelixencia del mundu pensaben que'l dictador iraquí disponía de material que facía que representara un peligru".

"L'autoridá de la ONU, al mio paecer, veríase seriamente menospreciada nel casu hipotéticu qu'ustedes tán plantegando: que llegáramos a un puntu máximu de presión y dempués baxáramos otra vez sin desarmar a Sadam. Creo qu'eso sería mui perxudicial pa cualquier de los oxetivos multillaterales que tenemos y que se deben persiguir al traviés de Naciones Uníes", manifestó.

Nesti sen, "el ministru señaló que cuanto más tarda la ONU n'imponer la so voluntá, más dures son les midíes que se requieren cuando a lo último impón la so voluntá".

El ministru afirmó que "tovía existe un gran alderique na ONU sobre cuándo ta bien intervenir militarmente n'otros países y calcó na falta d'una idea clara al respecto d'hasta qué puntu compromisos como la responsabilidá de protexer van ser más que palabres nun papel".

D'otru llau, Miliband refugó les crítiques qu'apunten a que'l derrocamientu del Gobiernu iraquí nel 2003 dio vía llibre a Irán p'appoyar a grupos milicianos y desestabilizar Oriente Próximu.