Miyamoto, padre del videuxuegu, Premiu Príncipe de Comunicación y Humanidaes

REUTERS

UVIÉU, 23 de Mayu (EUROPA PRESS)

El diseñador de videoxuegos xaponés Shigeru Miyamoto resultó galardonáu col Premiu Príncipe d'Asturies de Comunicación y Humanidaes 2012, tres imponese a otros finalistes como l'Axencia Magnum y el filósofu francés Edgar Morín, según fizo público esti miércoles n'Uviéu'l Xuráu encargáu de la so concesión.

Según informó la Fundación Príncipe d'Asturies, el xuráu d'esti premiu tuvo presidíu por Adela Cortina Orts y integráu por José Antonio Álvarez Gundín, José Manuel Diego Carcedo, Albert Espinosa i Puig, Javier González Ferrari, Miguel Ángel Liso Tejada, Catalina Luca de Tena y García-Conde, José Antonio Sánchez Domínguez, Ricardo Senabre Sempere, José Antonio Vera Gil, Enrique de Ybarra y Ybarra y Ramón López Vilas (secretariu). La candidatura presentóla Iván Fernández Lobo, presidente de l'Academia de les Artes y les Ciencies Interactives.

Consideráu'l padre del videoxuegu modernu, Shigeru Miyamoto nació en 1952 en Kyoto, Xapón. Graduáu n'Arte y Diseñu Industrial pola Universidá de Kanazawa (Xapón), ye nesti momentu director alministrativu xeneral del Área d'Entretenimientu, Analís y Desarrollu de Nintendo Co Ltd., compañía de la que forma parte dende 1977, y máximu responsable del Área Recreativa y de Desarrollu de Productu. Diseñador y productor de videoxuegos, Miyamoto ye autor, ente otros, del videoxuegu Mario Bros, que con 275 millones d'unidaes vendíes, tornó na saga más comercializada de la historia.

Diseñó más de cien viodeoxuegos, algunos de los cualos, Mario Bros o Zelda, tán consideraos como los meyores de la historia. Concretamente, la crítica definió la saga The Legend of Zelda como "el meyor videoxuegu creáu hasta agora". En 1996 marcó otru finxu con Super Mario 64, el primer xuegu realizáu íntegramente en 3D, que foi pioneru al dotar de movimientu a personaxes y cámares de forma independiente. Shigeru Miyamoto ye'l ceador de la primer consola de doble pantalla, siendo una d'elles táctil, Nintendo DS, de la que se vendieron n'Europa tres millones y mediu d'unidaes nun añu. Esta consola sustituyó, nel 2012, a la tradicional audioguía del Muséu del Louvre.

CREACIONES SIN VIOLENCIA

Caracterizáu por escluyir la violencia de les sos creaciones, Miyamoto revolucionó'l sector con programes como Brain Training, diseñáu, como'l so nome indica, pa exercitar la mente; Wii Music, xuegu de composición musical que tornó na ferramienta más popular d'enseñanza d'esta materia que yá utilicen escueles de tol mundu, y Wii Fit, una tabla d'exercicios que la primer vez contrólase col movimientu del cuerpu, y de la que se vendieron más de treinta millones d'unidaes.

Gracies a estes creaciones llogró faer del videoxuegu una revolución social y llogró popularizalu ente un grupu de población que nun accediera tovía a esti tipu d'entretenimientu, faciendo de la mesma que seya un mediu a de unir a les persones sin distinción de sexu, edá nin condición social o cultural. Asina, Shigeru Miyamoto plantega los xuegos como un elementu d'integración familiar y social, una esperiencia que pueda ser compartida por toos, qu'ayude a espresar emociones y llogre trescalar al xugador.

Miembru del Salón de la Fama de l'Academia de les Artes y les Ciencies Interactivas (1998) y Caballero de la Orde de les Artes y les Lletres de Francia (2006), Shigeru Miyamoto llogró, amás, importantes distinciones ente les que destaquen el so nomamientu como'l personaxe más influyente del mundu nel 2008 pola revista Time (EEUU), y el Premiu GAME otorgáu pola Academia Británica de les Artes Cinematográfiques y de la Televisión (Reinu Uníu, 2010), de la que tamién lu nomaron miembru.

Nesta edición concurríen un total de 21 candidatures procedentes d'Alemaña, Arxentina, Canadá, Colombia, Cuba, Estaos Uníos, Francia, India, Irán, Xapón y España.