Afirma que la llingua tien que protexese énte polémiques "o imposiciones estériles que l'alloñen de la ciudadanía"
UVIÉU, 21 Feb. (EUROPA PRESS) -
L'alcaldesa d'Avilés, la socialista Mariví Monteserín, señaló que dende'l Conceyu entienden que la promoción y aprendizaxe del asturianu tien que ser "siempre voluntaria". "Creo qu'esto ye dalgo a tener mui en cuenta y mui presente, indicó.
Asina se pronunció Monteserín nun discursu pronunciáu nel actu principal del Día de la Llingua Materna, celebráu esti miércoles n'Avilés y nel que participaron el conseyeru d'Educación y Cultura, Genaro Alonso, únicu miembru del Executivu asturianu que faló públicamente a favor de la oficialidá.
En plenu debate sobre'l marcu llegal de la llingua asturiana, Monteserín, que s'asitió a favor de Susana Díaz y José María Pérez a secretarios xenerales del PSOE y de la FSA, respectivamente, indicó que la llingua, amás de formar parte esencial del nuestru patrimoniu cultural, "identifícanos y singularízanos como asturianos y asturianes".
"Tenemos una llingua, tan rica como variada, que cuenta con singularidaes propies en función de cada localidá, de cada contorna, a lo llargo de tol nuestru territoriu", opinó, p'añadir qu'esa "riqueza" esixe facer un esfuerciu de caltenimientu y promoción de toes y cauna de les mesmes "na so concepción d'elementu cultural de la nuestra tierra".
Amás, añadió que se trata d'un compromisu "que tenemos qu'asumir convirtiéndola nun elementu d'unidá, de xermandía y de reconocencia, de tala forma que llogremos protexela énte polémiques o imposiciones estériles qu'en nada la beneficien y que l'alloñen de la ciudadanía".
Nesi sentíu, l'alcaldesa señaló qu'a pesar de la fola d'inmigración vivida pola ciudá, Avilés siempre tuvo "mui concienciada del valir de promocionar la nuestra llingua", lo que pa Monteserín ye un exemplu "d'integración y compromisu cola nuestra sociedá".
"Siempre fuimos mui conscientes del valir de la llingua como patrimoniu cultural que tenemos que caltener y promocionar", indicó, p'añadir qu'esa promoción y aprendizaxe tien que ser siempre voluntaria. "Creo qu'esto ye dalgo a tener mui en cuenta y mui presente", señaló.
