UVIÉU, 18 d'Avientu (EUROPA PRESS)
L'alcaldesa de Xixón, Carmen Moriyón, considera qu'han ser les fuerces y cuerpos de seguridá los que determinen si tendría proceder a espulsar al grupu ultra Ultra Boys del estadiu d'El Molinón, de propiedá municipal.
Asina respondió, mientres la so visita a los trabayos de valtamientu y llimpieza del recintu del solar de la escuela infantil José Zorrilla, a preguntes sobre si'l Conceyu embaraxa encamentar al Sporting prohibir la entrada a esti colectivu, puesto que'l Conceyu ye'l propietariu de la instalación.
Moriyón indicó que nun tien que ser una idea del Conceyu, anque matizó que nes xuntes de los vienres de los Cuerpos y Fuerces de Seguridá, nes que participa la Policía Llocal, va ser d'onde salga la meyor manera de tratar la situación.
Según ella, han ser éstos, los profesionales de los Cuerpos y Fuerces de Seguridá, los que tengan que dicir lo que consideren que ye lo meyor y los qu'aconseyen lo que hai que facer. Moriyón, que mostró preocupación pol problema, apuntó qu'hai que ser "consecuentes y responsables". Y sobre'l tema de la negociación de la venta del Sporting, apuntó qu'hasta qu'estes lleguen al so fin "sería una irresponsabilidá" del Conceyu dar una opinión.
Sobre'l tema del Sporting, el conceyal de Seguridá Ciudadana, Rafael Felgueroso, señaló, en declaraciones a los medios, que'l partíu d'esti domingu ta consideráu d'altu riesgu, polo que va estudiase'l vienres, na xunta de coordinación policial, el dispositivu de seguridá. Calcó en que la competencia correspuende a la Policía Nacional, siguiendo les directrices de la Comisión Antiviolencia, y que Policía Llocal collabora.
