UVIÉU, 27 de Xunetu (EUROPA PRESS)
L'alcaldesa de Xixón, Carmen Moriyón, criticó esti llunes al Gobiernu asturianu por nun aplicar sanciones a episodios como los de la nube de carbón surdida nel puertu d'El Musel y qu'afectó a la parte oeste de la ciudá esti vienres. Anunció amás una "dura" ordenanza municipal pa regular actividaes industriales contaminantes.
Nuna rueda prensa pa referise a los socesos del vienres, Moriyón recordó que'l Gobiernu asturianu aprobó un Plan de Calidá del Aire nel 2014 y q'ella confiaba en que fuera "un elementu útil pa regular les actividaes industriales contaminantes".
"Pero ta visto que cuando hai accidentes el Principáu lléndase a abrir un espediente sancionador qu'acaba en nada, lo que dexa indefensa a la población y tresllada el mensaxe de la impunidá", criticó. Según l'alcaldesa, "la máxima de que'l que contamina paga nun se cumple y el culpable ye'l Principáu".
Reprochó que mientres el Conceyu de Xixón trabaya pa intentar promocionar el turismu y que la ciudá seya cabezalera del crecimientu nel norte, "despues tengamos estos incumplimientos". "Nun lo voi consentir. Doi la mio palabra a tolos mios vecinos de Xixón de qu'esto nunos meses va arreglase", añadió.
