UVIÉU, 19 d'Avientu (EUROPA PRESS)
Un home de 56 años morrió y una muyer resultó firida leve nun accidente de tráficu, nel que se vieron implicaos dos turismos, na carretera SB-3, al altor d'El Castillu, en dirección a L'Arena, nel conceyu de Sotu'l Barcu, según informó'l 112-Asturies.
Los servicios sanitarios desplazaos al llugar, equipu médicu de la UVI-móvil d'Avilés, y equipu d'Atención Primaria de Sotu'l Barcu, namás pudieron verificar el so fallecimientu. La Guardia Civil fízose cargu de los trámites pa proceder al llevantamientu del cadabre.
Efectivos de Bomberos del Serviciu d'Emerxencies escarcelaron al home del interior del turismu que conducía, matrícula O-8661-A. En recibiendo la correspondiente autorización xudicial, los bomberos procedieron a abrir buecu separando'l salpicaderu y cortando'l techu y la puerta del conductor del turismu, pa poder escarcelar los restos mortales del fináu.
A la conductora del otru turismu implicáu nel accidente, matrícula 8410-GPN, desagospiáronla na ambulancia de soporte vital básicu d'Avilés al Hospital de San Agustín. Según SAMU, la muyer, de 54 años d'edá, presentaba, a falta de más exames y hasta nueva valoración médica, policontusiones de calter leve.
El Centru de Coordinación d'Emerxencies recibió l'avisu a les 10.22 hores. Na llamada señalaben que, por causes que desconocíen, dos vehículos chocaren frontalmente na citada carretera. N'unu d'ellos había un home gravemente firíu y creíen qu'atrapáu.
