MADRID, 22 d'Avientu (OTR/PRESS)
El cantante británicu Joe Cocker morrió a los 70 años d'edá por causa de una llarga batalla contra un cáncer de pulmón, según informó'l so manager, Barrie Marshall, nun comunicáu publicáu por Sony, según indica la cadena ITV.
"John Robert Cocker, conocíu pola so familia, amigos, la so comunidá y tolos sos fans alredor del mundu como Joe Cocker, morrió esti 22 d'avientu, tres una dura batalla contra un cáncer de pulmón. Mr. Cocker tenía 70 años", señala nel comunicáu y sigue: "El so éxitu internacional como cantente de rock y de blues empezó en 1964 y sigue hasta güei. Joe creó sobre 40 discos y xiró per tol mundu".
El cantante va pasar a la historia de la música por interpretar cola so personal voz rota cantares como 'With a litle help from my friends', 'You can leave hour hat on' o 'You are so beautiful', ente munches otres.
Joe Cocker nació'l 5 de mayu de 1944 en Sheffield, Reinu Uníu, onde vivió mientres el so primeres 20 años de vida y na que participó en delles pequenes bandes dende que tenía 15 años. La primer d'elles llamábase The Avengers (baxo'l nome artísticu de Vance Arnold), siguida de Big Blues (1963) y The Grease Band (1966).
El so mayor éxitu llegó con una versión innovadora de 'With a little help from my friends', estrayida del discu 'Sgt. Pepper's Lonely Hearts Club Band' de The Beatles, nel qu'incorporaron al guitarrista principal de Led Zeppelin, Jimmy Page, encabezando mientres una selmana la llista de cenciellos de Gran Bretaña en noviembre de 1968.
En 1969, con namás 25 años, participó nel Festival de Woodstock, onde interpretó dellos cantares, como 'Delta lady', 'Some things goin' on', 'Let's go get stoned' y 'I shall be released', anque foi precisamente 'With a little help from my friends' la interpretación que va pasar a la historia como una de les actuaciones más icóniques d'aquel festival, col que se definió a toa una xeneración de músicos.
A esti discu siguiólu una infinita llista, na que destaquen 'Joe Cocker!' (1969), 'Joe Cocker: something to say' (1972), 'I can stand a little rain' (1974), 'Jamaica say you will' (1975), 'Stingray' (1976), 'Sheffield steel' (1982), 'Civilized man' (1984), 'Unchain my heart' (1987), 'One night of sin' (1989), 'Across from midnight' (1997), 'Respect yourself' (2002), ente munchos otros, amás d'una bayura d'álbumes de directos o recopilatorios.
