UVIÉU, 18 Sep. (EUROPA PRESS) -
Dos persones finaron nun accidente de tráficu nel que se vieron implicaos dos vehículos, un turismu y una furgoneta, na A-63, al altor del puntu kilométricu 11, sentíu Salas, nel túnel de Priañes, en Grau, según informó'l 112-Asturies.
Según los datos facilitaos pol Serviciu d'Atención Médica Urxente (SAMU) los servicios médicos movíos al llugar, equipu médicu de la UVI-móvil d'Uviéu, namás pudieron verificar el so fallecimientu. Trátase d'un varón y una muyer, d'aproximadamente 68 años, que viaxaben nun turismu matrícula 1588-GRX.
Los restos mortales de dambos tuvieron que ser escarcelaos del interior del coche por efectivos de Bomberos del Serviciu d'Emerxencies del Principáu d'Asturies (SEPA) con base nel parque de Grau. En recibiendo la correspondiente autorización de la Guardia Civil los bomberos dieron n'abrir por entero unu de los llaterales del turismu y rescataron dambos cuerpos. La Guardia Civil fíxose cargu de los trámites pa proceder al llevantamientu de los cadabres.
El conductor del otru vehículu implicáu nel accidente, una furgoneta matrícula 9962-GYD, resultó ilesu. El Centru de Coordinación d'Emerxencies recibió l'avisu a les 14.49 hores. Na llamada señalaben qu'un turismu y una furgoneta topetaren dientro del túnel. Nel interior d'unu de los vehículos había dos persones creíen qu'atrapaes y gravemente mancaes.
