UVIÉU, 22 de Xunetu (EUROPA PRESS)
Los bomberos alcontraron el cuerpu sin vida d'un home de 61 años nel interior d'una de los dos viviendes calcinaes nuna quema, nel pueblu d'Espinaréu, nel conceyu de Piloña, según informaron fontes del Serviciu d'Emerxencies del Principáu d'Asturies (SEPA).
Efectivos de bomberos con base nos parques de Piloña y La Morgal estinguieron el fueu declaráu. Nel interior d'una d'elles los bomberos alcontraron el cuerpu sin vida d'esti varón, d'unos 61 años d'edá. La Guardia Civil fízose cargu de realizar tolos trámites pa proceder al llevantamientu del cadabre. El fueu calcinó dafechu les dos viviendes, de dos altures caúna, que s'alcontraben ubicaes nel mediu d'esta población.
El Centru de Coordinación d'Emerxencies recibió l'avisu a les 03.10 d'esti martes. Na llamada indicaben que taba quemando una casa onde vivía una persona. Desconocíen si nesi momentu había daquién nel interior. Esplicaron qu'había más viviendes pegaes a l'afectada.
Al momentu movilizóse una dotación, compuesta por trés efectivos, de bomberos con base nel parque piloñés que se desplazó al llugar con dos autobombes, y paralelamente tamién s'activó otra dotación, con otros trés efectivos, una autobomba nodriza y una autobomba urbana, con base nel parque central de La Morgal.
A les 04.28 hores los bomberos informen que'l fueu que se declarara na primer vivienda ta controláu. Nel interior de la mesma había una persona finada. La Guardia Civil ficiérase cargu de proceder al llevantamientu del cadabre. L'inmueble quemó dafechu y el fueu pasó a otra vivienda. Tán trabayando na so estinción. Casi dos hores dempués, a les 06.18 hores, dieron por controláu'l fueu nesti segundu inmueble.
