UVIÉU, 28 de Marzu (EUROPA PRESS)
El presidente de l'Asociación d'Empresarios de Campings d'Asturies, Ramón Álvarez, negó dafechu esti miércoles que'l so colectivu tenga intereses económicos nel decretu de campamentos de turismu y otres modalidaes de turismu d'acampada, que'l Gobiernu del Principáu ta tramitando y que va regular el turismu n'autocaravanes.
Nuna rueda de prensa ofrecida na Federación Asturiana d'Empresarios (FADE) xunto al coordinador de la Mesa de Turismu de FADE y presidente de l'Asociación d'Hostelería y Turismu n'Asturies OTEA, José Luis Álvarez Almeida, l'empresariu mostró'l so apoyu a la norma, pero dixo que nun-y movíen razones de calter económicu.
"De nenguna manera tamos interesaos n'obligar a naide n'obligar a naide que vaya a les nueses empreses, porque nun queremos clientes insatisfechos nes nueses instalaciones", esplicó. Lo que pretenden, insistió, ye que les árees d'autocaravanes tean "bien regulaes" porque son "un complementu ideal pa los campings".
"Tamos dafechu a favor, nun hai nengún interés económicu nesto, quiero dexalo claro", insistió'l presidente de l'Asociación d'Empresarios de Campings d'Asturies.
Preguntáu sobre si col escenariu actual taben sufriendo un perxuiciu económicu con una especie de competencia deslleal con determinaes árees llendóse a responder: "Yo recibo calurosamente a los que van; y los que nun van nin miro pa ellos".
El proyectu de decretu tien el preste del Conseyu Asesor de Turismu d'Asturies y equipara la pernocta n'autocaravanes con "acampada", polo que señala como necesaria una regulación, que tamién afecta a les distintes árees municipales gratuites que yá tán habilitaes en dellos conceyos asturianos.
El coordinador de la Mesa de Turismu de FADE, José Luis Álvarez Almeida, defendió la norma porque lo que busca, esplicó ye unificar nuna norma la regulación pa tolos conceyos, de tala forma que cada conceyu asturianu nun estableza les normes que-y paezan.
Defendió los principios de "calidá", "sostenibilidá" y "seguridá" qu'ha tener el turismu n'Asturies y defendió'l requisitu del decretu, incluyida la obligación de llevar un control de los viaxeros que pernocten n'autocaravana n'Asturies, rexistrando la identidá de los viaxeros, igual que faen los campings o los establecimientos de turismu rural.
Sicasí, Álvarez Almeida non entró en diferencies a la hora d'aparcar o acampar nestos vehículos. Preguntáu sobre la diferencia llegal qu'eiste ente un usuariu d'una autocaravana que duerma nel so vehículu correchamente aparcáu y un camioneru que faiga lo propio na llitera de la so cabina llendóse a dicir: "Eso hai que preguntalo a la Guardia Civil, porque yo, de verdá...".
Darréu, dixo que los usuarios y autocaravanes son turistes y dixo que podría abrir la reflexón de si'l turismu deseable p'Asturies ye'l d'usuarios "durmiendo nos sos coches tolos díes".
Otru asuntu que punxo enriba de la mesa foi'l de los residuos d'esti tipu de vehículos. Almeida señaló que la regulación va garantizar que toles árees tengan los desagües apropiaos y les conexones de lluz. Anguaño, sin que'l decretu entrara en vigor, alvirtió de la falta de control nesa materia. "¿Ónde se desagüen les agües negres?, ¿dexámoslo al bon criteriu de caún", preguntóse.
La presidenta de l'Asociación Rexonal de Cases Rurales d'Asturies (Arca), Ana Soberón, tamién presente na rueda de prensa, añadió otru argumentu. "¿Por qué los conceyos cobren a los vecinos una tasa por recoyida de basura y nada a los autocaravanistes por depositar nes sos árees les agües grises y negres de los sos vehículos?", preguntóse.
REVÉS NA XUNTA
A toes eses cuestiones, según los empresarios daba una correcta respuesta'l decretu que, según Almeida, foi frutu del trabayu y consensu de dellos años. Sicasí, el proyectu sufrió la pasada selmana un importante revés na Xunta Xeneral del Principáu d'Asturies, cuando s'aprobó una iniciativa de Ciudadanos contraria al mesmu.
Almeida mostró la so indignación polo asocedío y dixo que nel Conseyu Asesor de Turismu, qu'avaló'l proyectu, tienen representación tolos partíos políticos. Por eso nun entiende'l refugu posterior nel parlamentu asturianu. Ye más, dixo que se reunió na Xunta colos distintos partíos y nengún, quitando Ciudadanos, mostró refugu a la norma. "Quiciabes depués dalgún vio la so oportunidá de salir na semeya", llamentó.
En tou casu, Almeida, que refuga que se cambie'l decretu, afirmó que si nun reciben dalgún de tipu "d'esplicación coherente" tres lo asocedío, FADE abandonará la mesa del Conseyu Asesor de Turismu.
ALCALDES
Tampoco entiende Almeida les crítiques al decretu que tán faciendo alcaldes, incluyíu'l presidente de la Federación Asturiana de Conceyos (FACC), Ignacio García Palacios. Según el representante de FADE lo que'l proyectu busca ye qu'haya una norma igual pa tolos conceyos evitando "agravios" y con un modelu de turismu que nun contemple "mamotretos nos cantiles".
El Conseyu Consultivu del Principáu d'Asturies decidió devolver el documentu al Gobiernu al entender que nun se sometió a la preceptiva consulta de los conceyos. Esta decisión tamién la criticó Almeida, que recordó que nel Conseyu Asesor de Turismu del Principáu yá hai representantes de la FACC.
Almeida dixo que la norma tamién ye bona pa los autocaravanistes porque garantiza que cuando visiten Asturies van contar con unes árees de "calidá" con un mínimu de servicios. "Esti decretu nun va contra los autocaravanistes, son los nuesos clientes", insistió.
La Mesa de Turismu de FADE ta integrada poles asociaciones empresariales OTEA, ARCA, Fastur, Ataya y Campings, qu'arrexunten al 90 por cientu de la ufierta turística asturiana, asina como pola Facultá de Turismu d'Uviéu y la Cámara de Comerciu d'Uviéu.
