UVIÉU, 25 de Payares (EUROPA PRESS)
El director de cine Nabil Ayouch, que realizó la película 'Los caballos de Dios' nel 2012 qu'afonda na redolada de los terroristes islamistes radicales, mostróse contrariu a ofrecer respuestes simples hacia esi fenómenu. "Nun hai un únicu motivu pa qu'un neñu de diez años decida qu'inmolase y tornar en bomba humana ye una bona idea", dixo.
Ayouch pronuncióse nestos términos nuna entrevista que colgó na so canal de Youtube el Festival Internacional de Cine de Xixón (FICX). Ayouch ta estos díes na ciudá asturiana pa presentar la so última película, el discutiniu 'Much Loved', que trata d'unes prostitutes nel entornu marroquín. La cinta prohibióse en Marruecos y una de les sos actrices foi oxetu d'una agresión. El mesmu Ayouch recibió amenaces.
De primeres, en 'Los caballos de Dios' (God's Horses), Nabil Ayouch afondaba nes causes del averamientu al terrorismu yihadista con una historia ambientada nun pobláu de chaboles de Casablanca.
Tres los atentaos del pasáu 13 de payares en París, Ayouch cree qu'unu de los riesgos de la sociedá actual ye ofrecer una "única respuesta" a los peligros actuales que consisten namás n'aumentar la seguridá. Dixo qu'e+xisten munchos más factores a tener en cuenta.
Asina, punxo l'acentu na importancia de que los artistes y cineastes echen el so gabitu pa consiguir "espertar conciencies" ente los ciudadanos y que se dean cuenta de que "nun existe una única forma d'esplicar el mundu que mos arrodia".
Ayouch, que nació nun barriu periféricu de París en 1969 y treslladóse a Marruecos en 1999, esplicó que yá dende bien mozu espertó nél una conciencia política que lu llevaba a esplicar les razones de "los que tán al marxe".
Nesti sen, insistió en fuxir de la simplificación de les respuestes a la hora de referise a les causes del terrorismu islamista. "Ye daqué que nun se pue esplicar utilizando namás como argumentos la miseria económico o la manipulación de la relixón pa tresformar a daquién nun kamikaze; nun son solo ésos los elementos qu'impulsen a tomar esa decisión, hai toa una serie de detalles qu'espliquen esi percorríu vital y eso ye lo que traté d'esplicar na película", manifestó.
La película que presentó nel FICX, 'Much Loved', que trata sobre un grupu de prostitutes, prohibióse nes sales de Marruecos. Una de les actrices, Lubna Abidar, sufrió una agresión. Ayouch esplicó que la muyer tuvo que marchar de Marruecos a París, onde se ta recuperando. "Va dos díes que falé con ella y díxome que va meyor", señaló.
Pa facer la película, el director tuvo mientres añu y mediu recoyendo testimonios y histories de más de 200 prostitutes de Marruecos. Reconoció qu'hubo un momentu nel que tuvo que decidir si facer un documental o una historia de ficción. Optó polo segundo pa contar la historia real d'eses muyeres. Esplicó que siempre-y atraxo "dar la palabra al que naide oi" y contar les histories d'aquél al que "naide ve", casi dende la perspectiva d'un sociólogu, comentó na entrevista, recoyida por Europa Press.
