UVIÉU, 28 d'Abril (EUROPA PRESS)
El voceru d'Izquierda Abierta y d'IU na Xunta Xeneral del Principáu, Gaspar Llamazares, defendió esti vienres la necesidá d'una moción de censura "trabayada" que permita articular una alternativa al Gobiernu de Mariano Rajoy (PP). "Nun valen escuses", respondió Llamazares a preguntes pol refugu que mostró'l PSOE a apoyar la moción de censura qu'anunció Unidos Podemos.
"El PSOE ta nestos momentos nun procesu de primaries y casi toles sos reacciones tienen más que ver con cuestiones internes que con cuestiones xenerales; si fuera por razones xenerales del país, toi seguru que toos taríamos falando de sustituyir a un gobiernu que va acabar compareciendo ante la xusticia", indicó.
Según esplicó Llamazares, nun puede mirase al pasáu y hai que posicionase nesti momentu pa desarrollar una moción de censura "necesaria" ya "imperativa" qu'aparte al Gobiernu de Rajoy porque "ta faciendo dañu a la democracia española pola corrupción y poles sos polítiques d'austeridá".
Llamazares confía qu'esti asuntu resuélvase en selmanes y que la moción avance con una estratexa de "unidá y collaboración". A preguntes por si la iniciativa promovida por Pablo Iglesias ye más un xestu qu'una estratexa real, respondió: "vamos velo nos próximos meses, si ye una iniciativa que pretende diálogu y acuerdu, o una táctica pa usar la moción como un termómetru".
