NUEVA YORK, 18 d'Avientu (EUROPA PRESS)
L'influyente diariu estdounidense 'The New York Times', que nos últimos meses vieno apoyando un cambiu na política d'Estaos Uníos hacia Cuba, dixo nun editorial que la decisión de Barack Obama de normalizar les relaciones cola Isla ye "un pasu valiente qu'acaba ún de los capítulos más equivocaos na política esterior d'Estaos Uníos".
'The New York Times', que'l pasáu mes d'ochobre pidió claramente acabar col embargu d'Estaos Uníos a Cuba, que tachó de "insensatu", publicó na so estaya editorial un artículu tituláu 'Obama da un pasu históricu con Cuba', poco dempués de que se conociera oficialmente l'anunciu sobre'l restablecimientu de relaciones diplomátiques ente la Isla y Estaos Uníos.
Nel artículu d'opinión, 'NYT' destacó que la decisión de volver a entamar eses relaciones, rotes hai 53 años, supón l'abertura, per parte de la Casa Blanca, d'una "etapa tresformadora" pa millones de cubanos "que sufrieron como resultáu de más de mediu sieglu d'hostilidá ente les dos naciones".
El diariu destacó qu'anque Obama pudo optar por dar "unos pasos modestu y graduales" pa buscar un averamientu col Gobiernu cubanu, actuó "con valentía, faciendo tolo que ta al so algame, mientres sigue en vixencia una retrógrada llei aprobada en 1996, qu'impón estrictes sanciones a la isla en busca d'un cambiu de réxime".
De la mesma manera, señaló que'l presidente cubanu, Raúl Castro, "merez reconocencia pol so pragmatismu", y argumentó qu'anque Cuba sigue siendo "un estáu policial con una economía fallida", dende qu'asumió'l mandu del país nel 2008, promovió una serie de reformes económiques "qu'emponderaron al cubanu común y corriente", y suspendió restricciones "que cruelmente torgaben que munchos cubanos viaxaren al esterior".
Sicasí, alvirtió que, si se tien en cuenta la complexa historia de la relación ente Cuba y Estaos Uníos, "ye bien fácil qu'esti nuevu capítulu traiga barruntos y reveses". Ante esa eventualidá, consideró que los líderes d'ambos países "tienen que facer tolo posible por manexalos de manera racional y constructiva".
En destacando que'l xiru dau a les relaciones ente Washington y L'Habana podría acabar representando "el más importante legáu de política esterior" pal actual presidente d'Estaos Uníos, el diariu estaounidense prevé que "lo más seguro ye que la historia reconoza qu'Obama atinó".
