BERLÍN, 28 de Xineru (Reuters/EP)
El presidente d'Estaos Uníos, Barack Obama, y la canciller alemana, Angela Merkel, manifestaron la so preocupación pol agravamientu de los combates nel este d'Ucrania y apostaron por esixir responsabilidaes a Rusia pol empeoramientu de la situación.
Los líderes estaounidense y alemana falaron a última hora d'esti martes per teléfonu sobre la situación n'Ucrania y manifestaron el so refugu al apoyu que ta dando'l Gobiernu de Moscú a los separatistes prorrusos asitiaos en Lugansk y Donetsk.
Amás, sorrayaron la necesidá d'apurrir fondos pa estabilizar la economía ucraniana. La Casa Blanca indicó nun comunicáu que Merkel y Obama tán preocupaos pol "apoyu material de Rusia a los separatistes" y por nun llograr que se caltenga l'altu'l fueu acordáu en Minsk en septiembre del 2014.
El presidente norteamericanu y la canciller alemana coincidieron en "la necesidá d'esixir responsabilidaes a Rusia poles sos acciones". Esti miércoles, el secretariu del Tesoru norteamericanu, Jack Lew, aseguró que'l so país ta dispuestu a aumentar les sanciones contra Rusia si ye necesario, en declaraciones mientres la firma d'un creitu de 2.000 millones de dólares (1.760 millones d'euros) pal Gobiernu de Kiev. Lo mesmo la canciller que'l presidente estaounidense apostaron por apurrir "un paquete robustu d'apoyu financiero" pa estabilizar Ucrania.
Los ministros d'Asuntos Esteriores de la Unión Europea tienen previsto solicitar a la Comisión Europea na xunta d'esti xueves que prepare nueves sanciones contra Rusia, magar la decisión final nun se va adoptar hasta'l conceyu de xefes d'Estáu y de Gobiernu del 12 de febreru.
