Obama nun incluirá a Corea'l Norte na so llista de países que supuestamente apoyen el terrorismu

WASHINGTON, 4 de Febreru (Reuters/EP)

El presidente d'Estaos Uníos, Barack Obama, unvió esti miércoles una carta a dellos congresistes norteamericanos na qu'informa de la so decisión de caltener a Corea'l Norte fuera de la llista de países qu'apoyen al terrorismu.

El pasáu mes de xunu la secretaria d'Estáu, Hillary Clinton, elevare les posibilidaes de volver incluir a Corea'l Norte na llista negra, como respuesta al ensayu nuclear y a los llanzamientos de misiles efectuaos pol país asiáticu meses antes. Dellos senadores demócrates lleven tiempu pidiendo que se vuelva a asitiar a Pyongyang xunto al restu de países que, según la versión estaounidense, collaboren con grupos terroristes.

La misiva unviada por Obama a los congresistes acompaña a un informe clasificáu nel que s'evalúa la conducta de les autoridaes norcoreanes nel periodu que va ente'l 25 de xunu del 2008 y el 16 de payares del 2009. El presidente norteamericanu diz que l'estudiu entiende que Corea'l Norte "nun cumplen colos criterios establecíos pa que lu califiquen como país qu'apoya'l terrorismu".

A Corea'l Norte sacáronla de la llista negra del Departamentu d'Estáu n'ochobre del 2008, nun intentu del ex presidente George W. Bush por evitar la rotura de les negociaciones internacionales a seis bandes pa la desnuclearización de Pyonyang. Dende qu'asumió'l cargu, Obama incrementó la diplomacia col país asiáticu pa tratar de convencer a les autoridaes norcoreanes que vuelvan a la mesa de negociaciones.