Obama promete l'apoyu d'EE.UU pa posibilitar el desarrollu d'El Salvador y Centroamérica

WASHINGTON, 9 de Marzu (Reuters/EP)

El presidente d'Estaos Uníos, Barack Obama, prometió esti llunes al so homólogu salvadoreñu, Mauricio Funes, que Washington va emprestar toles ayudes necesaries pa facer posible tol desarrollu y la prosperidá d'El Salvador.

Nuna rueda de prensa celebrada na Casa Blanca tres la xunta caltenida ente ambos mandatarios, Obama aseguró qu'Estaos Uníos quier caltener una relación d'igual a igual con tolos países de Centroamérica, pa combatir asina les causes que provoquen la delincuencia na rexón.

"Queremos ayudar como seya necesario pa garantizar qu'esistan creitos, infraestructures y otres ferramientes qu'apurran prosperidá al llargu plazu n'El Salvador", indicó'l presidente norteamericanu.

En materia comercial, Obama destacó que la metá de les esportaciones realizaes pol país centroamericanu tienen Estaos Uníos como destín, mientres que menos d'un 33 por cientu de los productos importaos por El Salvador proceden del país norteamericanu. "Busquemos víes pa siguir aumentando les nueses relaciones comerciales", señaló Obama sobre la so xunta con Funes.

Per otra parte, el mandatariu norteamericanu dixo que dende qu'asumió la presidencia en xineru del 2009 ta tratando d'ameyorar les relaciones colos países d'América Llatina y aseguró que n'Estaos Uníos siguen preocupando los asuntos relacionaos cola seguridá, el tráficu de drogues y les mafies na rexón centroamericana.

"Los retos de seguridá tán claramente rellacionaos colos retos económicos a los que s'enfrenta la rexón; queremos ayudar a combatir los síntomes que vemos en forma de delincuencia, pero tamién sobre los raigaños que los causen", añadió.

Funes, qu'asumió la presidencia d'El Salvador el pasáu mes de xunu, allabó a Obama y dixo que con él en Washington hai esperances de qu'EE.UU torne nun sociu estratéxicu de Centroamérica.

"Definitivamente, nun podemos culpar a EE.UU pola situación na que mos alcontramos", dixo'l presidente salvadoreñu. "Tamos tratando de qu'EE.UU torne nun sociu estratéxicu. Como bien dixo Obama, nun buscamos un sociu mayor, sinón un sociu d'igual a igual y eficiente".