ABUYA, 20 d'Ochobre (Reuters/EP)
La Organización Mundial de la Salú (OMS) declaró esti llunes a Nixeria país llibre d'ébola dempués de que nun se detectara nengún nuevu casu mientres 42 díes.
"Nixeria ta agora llibre d'ébola", declaró'l representente de la OMS en Nixeria, Rui Gama Vaz, en rueda prensa n'Abuya, la capital. "Ésta ye una historia d'éxitu espectacular (...) demuestra que l'ébola pue contenese pero tenemos que dexar claro que namás ganamos una batalla, la guerra namás va acabar cuando África Occidental tamién tea declarada llibre d'ébola", sorrayó.
El primer casu en Nixeria, el país más pobláu d'África, foi importáu dende Lliberia, cuando un diplomáticu americano-liberianu llamáu Patrick Sawyer esmayóse nel aeropuertu internacional de Llagos el 20 de xunetu.
Puesto que'l país nun taba bien preparáu y nun tenía procedimientos de vixilancia en marcha, Sawyer pudo contaxar a delles persones, incluyíos dellos trabayadores sanitarios del hospital al que lu treslladaron, que nun contaben col equipu de protección afayadizu.
L'ébola dexó 4.546 muertos principalmente en Liberia, Guinea y Sierra Lleona, los trés países más afectaos. En Nixeria hubo 20 casos confirmaos y ocho muertes. El vienres, la OMS yá declarara a Senegal país llibre d'ébola.
