BUDAPEST, 4 de Setiembre (Reuters/EP) -
El fluxu d'inmigrantes y refuxaos que lleguen a Europa ye interminable y si la UE nun protexe les sos fronteres podríen llegar decenes de millones más hasta'l puntu de que los europeos fueren "minoría" nel continente, alvirtió esti vienres el primer ministru húngaru, Viktor Orban.
"La realidá ye qu'Europa ta amenazada pol fluxu masivu de persones, munches decenes de millones de persones podríen venir a Europa", sorrayó. "Agora falamos de cientos de miles pero l'añu qu'entra vamos falar sobre millones y esto nun tien fin", alvirtió.
"De sópitu, vamos ver que somos una minoría nel nuesu propiu continente", previó en declaraciones a una radio llocal, encamentando a Europa "mostrar fuerza protexendo les nueses fronteres".
Mientres la so visita esti xueves a Bruxeles pa reunise colos máximos responsables de la UE, Orban caltuvo que la crisis de refuxaos actual "ye un problema" d'Alemaña, puesto que la gran mayoría de los que lleguen quieren dir a esti país. Coles mesmes, encamentó a los que parten de Turquía que queden nesti país, puesto que ye "un país seguru".
Hungría tornó na principal puerta d'entrada al espaciu Schengen de los miles d'inmigrantes y solicitantes d'asilu que tán llegando nes últimes selmanes a Grecia, cruzando de Turquía. Dende Grecia, crucen Macedonia y Serbia hasta llegar a Hungría, dende onde traten de siguir el so camín hacia otros países, principalmente Alemaña.
