MADRID, 21 d'Ochobre (EUROPA PRESS)
L'atleta sudafricanu Oscar Pistorius resultó condenáu a cinco años de prisión por matar a la so moza, Reeva Steemkamp, el 14 de febreru de 2013, nun fallu dictáu esti martes pola xueza del Tribunal Supremu de Pretoria Thokozile Masipa.
Amás, Masipa condenó a Pistorius a una pena de trés años de cárcel suspendida por posesión d'armes de fueu. Pistorius permaneció con semblante atristayáu mientres la llectura de la condena y los argumentos que la apoyen.
"Señor Pistorius, llevántese, por favor. Lo siguiente ye lo que considero una sentencia que ye xusta tanto pa la sociedá como pal acusáu. Del primer cargu: culpable d'homicidiu, la sentencia impuesta ye'l periodu máximu de prisión, de cinco años, acordies cola Llei de Procedimientu Penal", afirmó la xueza, n'esplicando los fundamentos de derechu de la condena nuna esposición de casi una hora de duración.
Na vista xudicial celebrada esti martes tres dellos aplazamientos, la xueza Masipa argumentó que les cárceles sudafricanes tán preparaes p'acoyer a un presu con discapacidá como ye'l casu de Pistorius.
Según informó la BBC, la familia de Reeva Steenkamp manifestó la so satisfacción pola condena impuesta a Pistorius y aseguró que nun va recurrir el fallu xudicial y qu'espera que lu treslladen del tribunal directamente a la prisión.
Un espertu llegal consultáu pola cadena de televisión pública británica dixo que Pistorius tendrá que cumplir siquier una sesta parte de la condena de cinco años de cárcel antes de poder acceder al réxime d'arrestu domiciliariu.
