Osoro tomará posesión como arzobispu de Valencia'l 18 d'abril y asegura que lleva 27 díes deprendiendo valencianu

UVIÉU, 08 de Xineru (EUROPA PRESS)

Carlos Osoro, arzobispu d'Uviéu, pidió güei collaboración a la diócesis de Valencia nel so nuevu llabor d'arzobispu que va asumir el día 18 d'abril. Osoro ofreció güei una rueda prensa, tres facese públicu'l nomamientu pol qu'espresó ante los medios de comunicación la so satisfaición y aseguró tar deprendiendo valencianu dende hai yá 27 díes, cuando tuvo "conocencia de la decisión".

Na declaración ante los medios de comunicación, na que tuvo acompañáu pol Obispu auxiliar, Raúl Berzosa, y otros sacerdotes, dio llectura a una carta a los asturianos y espardió un escritu dirixíu a l'archidiócesis de Valencia. Osoro va siguir como alministrador apostólicu de l'archidiócesis d'Uvieú hasta que tome posesión el so sucesor, sobre'l cual evitó pronunciase tanto no relativo a plazos como a nomes. "Eso lo va decidir el Santu Padre", dixo el entrugalu pol so relevu.

Osoro mostró'l so agradecimientu pola so estapa de siete años nel Principáu na que desarrolló un trabayu "a tope" y destacó'l "corazón tan grandón de los asturianos". "Los sentimientos de cariñu y que manifestasteis son tan grandes que nunca vos voi poder olvidar", dixo Osoro, que garantizó que "la parte d'asturianía que deprendí equí voi ponela en práutica onde voi".

Del so pasu per Asturies, destacó'l procesu del Sínodu, que va continuar el so sucesor. "Va ser él el que deba decidir sobre l'asamblea sinodal anque los grupos de reflexón van siguir mientres yo siga como aliministrador apostólicu", espunxo. Sobre les asignatures pendientes, almitió que "seguramente van ser munches", y añadió que "si me sometieren a un exame seguramente lo diba suspender y nun me diba dar el públicu".

Sobre la so nueva etapa en Valencia, recordó que'l so primer contautu cola Archidiócesis lu caltuvo col Seminariu valencianu a onde foi cuando se-y encamentó'l llabor d'abrir el de Santander, dalgo que recuerda na so carta.

Na carta, asegura qu'acueye la so desginación "como una bendición de Dios, de les munches qu'al traviés de la mio vida me regaló", y na qu'agradez el so nomamientu al Pontífice y al so antecesor, el cardenal Agustín García-Gasco, el so "afeutu y paternidá dende siempre".

Osoro diríxese a los diocesanos valencianos pa indica-yos que "sé que la mio vida nun ye pa mí, sinón pa vosotros. Recibii-la cola probitú que tien, pero cola seguridá de que voi gastar la vida por anunciar a Xesucristo con vosotros. Quiero ser de toos y pa toos".

Monseñor Osoro destacó nel entamu de la carta que "son munchos años" los que fai que conoz a García-Gasco y sorraya que "too ello me fai sentime mui prestoso yá en Valencia". Tamién agradez a los obispos auxiliaries de Valencia, Esteban Escudero, Enrique Benavent y Salvador Giménez, "la vuesa acoyida y pola vuesa ayuda".