AVILÉS, 17 Ene. (EUROPA PRESS) -
El patronatu de la Fundación Enseña va cuntar cola participación d'otres entidaes, amás del Conceyu d'Avilés, según anunció esti miércoles en Madrid l'alcaldesa d'Avilés, Mariví Monteserín. La primer conceyala presentó na feria de turismu Fitur la que ye la propuesta de la ciudá pa esplotar el turismu idiomáticu.
Monteserín indicó qu'esti tipu de turismu "queremos que sía un factor motivacional agregáu a los que yá ufiertamos pa que nos visiten más persones". Va combinar la enseñanza del idioma con actividaes complementaries de calter cultural, deportivu, d'ociu, de participación social o de naturaleza.
L'alcaldesa avilesina dixo que "ye una iniciativa qu'encaxa perbién n'Avilés. La inmersión forma parte del procesu de conocencia d'un idioma y podemos facelo mui curiosu ufiertando un paquete d'estancia n'Avilés qu'incluya una enseñanza de calidá acompañada d'esperiencies práctiques basaes na nuestra actividá festiva o cultural, nos mercaos, na práctica deportiva, nos nuestros restaurantes, n'escursiones y visites prr toa Asturies... Tenemos un potencial que nos permite competir con otros espacios".
"Tamos falando de desenvolver economía privada a partir de la iniciativa pública reforciando la nuestra imaxe como destín turísticu. Va Ser un nuevu segmentu turísticu que va contribuir a la dinamización interna y a la xeneración d'actividá y d'oportunidaes nueves de vida", indicó Monteserín.
Monteserín reconoció que "ye un retu pa la ciudá ye'l so conxuntu: tenemos que responder bien toos, ufiertar calidá y una bona imaxe de manera que los estudiantes lleven una alcordanza bona y conviértanse n'embaxadores d'Avilés como destín idiomáticu". Recordó que "Gran Bretaña fixo del idioma una industria grande" y incidíu nel "valir económicu del español como segundu idioma nel mundu y el so potencial grande d'espansión con cuasi un centenar de Centros Cervantes en tol mundu".
La Fundación Enseña va tener la so sede nel Palaciu de Maqua cuando tea rehabilitáu. Mentanto va allugase nun sitiu provisional qu'entá nun se conoz. La propuesta de presupuestu pa 2018 del Gobiernu local recueye una partida de 80.000 euros, cantidá que va permitir constituir la Fundación y que pueda empecipiar la so actividá cola idea de recibir los primeres estudiantes en 2019.
