MADRID, 28 d'Abril (EUROPA PRESS)
El secretariu xeneral de Podemos, Pablo Iglesias, avisó esti vienres al PSOE y a Ciudadanos de que "nun hai escuses" pa nun apoyar la moción de censura promovida pola so formación contra'l presidente del Gobiernu, Mariano Rajoy, sacantes qu'opten por "caltener la corrupción".
"Nestos momentos, caltener a Rajoy ye caltener la corrupción", sentenció Iglesias nuna entrevista en Radiocable.com, recoyida por Europa Press, na que pidió a socialistes y 'naranxes' que seyan "coherentes". "O tas colos corruptos o non", insistió.
Según Iglesias, PSOE y Ciudadanos nun puen escudase nes formes emplegaes por Podemos pa nun sumase a la moción de censura, porque "el nivel de cangrena" de les instituciones por cuenta de "la corrupción del PP" ye "demasiao grave". "Nun hai escuses", insistió.
Nesti sen, Iglesias recordó al PSOE que cuando ellos presentaron una moción de censura en Murcia contra'l presidente autonómicu Pedro Antonio Sánchez nun informaron a Podemos y, sicasí, paeció-yos xusta y mostráronse dispuestos a apoyala. "¿Por qué lo que val en Murcia nun val pa España?", preguntóse.
"El nuesu país nun vivió una situación d'escepcionalidá como la que vivimos agora. Por eso la nuesa obligación ye presentar la moción de censura", argumentó, pa insistir en que ye urxente "sacar al PP de les instituciones".
"VAMOS SIGUIR ALANTRE"
Amás, Iglesias defendió qu'esta iniciativa "ye una demanda mayoritaria de la sociedá española" y por ello, pidió a PSOE y Ciudadanos que rectifiquen y ofreció-yos la posibilidá de presentar candidatos pa encabezar esa moción, si asina lo prefieren.
"Lo que tienen que facer les formaciones polítiques qu'apoyen a Rajoy ye dicir que sí a la moción y dempués que planteen los candidatos que quieran. Si PSOE y Cs rectifiquen, que propongan candidatos. Nun va ser problema pa nosostros", aseguró.
Coles mesmes, Iglesias reafirmó que, consigan o non los apoyos de PSOE y Ciudadanos, Uníos Podemos va siguir alantre cola moción, anque nun tenga posibilidaes de salir alantre nel Congresu por nun contar con mayoría abondo.
