MADRID, 27 d'Abril (EUROPA PRESS)
El líder de Podemos, Pablo Iglesias, anunció esti xueves que'l so grupu parlamentariu d'Uníos Podemos va presentar una moción de censura nel Congresu contra'l presidente del Gobiernu, Mariano Rajoy, y encamentó al PSOE y Ciudadanos a sumase, si de verdá quieren faer frente a "la corrupción del PP". Eso sí avisó de que si nun consiguen los sos apoyos, van presentar igualmente.
"Esta moción de censura ye un imperativu éticu. Ye necesario presentar midíes urxentes pa sacar al PP de les instituciones", aseguró nuna rueda de prensa qu'ofreció nel Congresu xunto colos voceros Podemos, En Comú Podem, IU y en Marea.
Según Iglesias, l'acumulación de casos de corrupción qu'avafen al PP somorguio a España en "un estáu d'escepción democráticu", col saquéu" de les alministraciones públiques y con un comportamientu parásitu de les instituciones" per parte del Gobiernu de Rajoy. "Sacar al PP de les instituciones ye una necesidá", acaba.
TIEN EL DOBLE DE DIPUTAOS NECESARIOS
La Constitución de 1978 establez qu'una moción de censura tien que proponela como mínimu la décima parte de los diputaos, esto ye, 35 parlamentarios, un requisitu que cumplen, dao qu'Uníos Podemos cuenta con 67 diputaos, mas los cuatro de Compromís colos qu'acudieron en coalición.
Por ello, Iglesias anunció qu'anque nun consigan sumar al PSOE y a Ciudadanos, van siguir alantre cola so iniciativa. "Sí", respondió tayante'l líder de Podemos a preguntes sobre si van rexistrar la moción anque nun tenga posibilidá de salir alantre.
Pel momentu, el secretariu xeneral 'moráu' esplicó que yá entamaron los contactos lo mesmo con otres fuerces polítiques como con organizaciones de la sociedá civil y sindicatos, como col secretariu xeneral de Comisiones Obreres, Ignacio Fernández Toxo, pa estudiar los términos d'esta moción de censura.
Anque Iglesias aseguró que yá falara col presidente de la xestora del PSOE, Javier Fernández, y col voceru, Mario Jiménez, pa pidi-yos una xunta, y que quedara a la espera d'una respuesta, los socialistes desmarcáronse de la iniciativa poco dempués de presentar públicamente la iniciativa.
Asina, el voceru del PSOE nel Congresu, Antonio Hernando, refugó dar apoyu a la moción de censura que planteó Iglesias y acusólu de "mala fe" y de "irresponsabilidá" al entender qu'estos "fueos artificiales" lo que faen ye "deteriorar" a la oposición.
RUEDA DE PRENSA
A pesar d'ello, Podemos va siguir encamentando a los socialistes a sumase, pidiéndo-yos que dexen a un llau la so situación interna y trabayen en "lo importante. "Hai que falar de que'l PP ta parasitando les instituciones de la nuesa patria. Tienen que tar pa protexer a tolos ciudadanos", defendió.
Iglesias tamién informó de que trató de ponese en contactu con Ciudadanos, anque daquella nun llograra respuesta. "Escribí a Albert Rivera pa pidir una xunta y deseo de verdá que dexen de caltener al PP. Creo qu'una parte del so electoráu nun entiende que sigan calteniendo al PP. Eso ye incompatible con caltener la llucha contra la corrupción", avisó.
"Nós nun entendemos qu'haya formaciones polítiques que se manifiesten abiertamente en contra de la corrupción y que coles mesmes apoyen al PP. Eso nun ye coherente, el criticar la corrupción de la que se caltién que'l partíu más corruptu d'Europa siga mandando. La lóxica fundamental pa entender lo que ta pasando ye de país, non de partíu", repostió.
NUN TOCA FALAR AGORA DE CANDIDATOS
La Constitución de 1978 tamién establez que la moción de censura tien qu'incluyir un candidatu a la Presidencia del Gobiernu, anque Iglesias nun quiso avanzar nada nesti sen porque agora nun toca, al so xuiciu falar "de nomes y cares" sinón de construyir una alternativa al PP".
"Nun ye una cuestión qu'haya que dicir agora. Esta moción tien que ser resultáu d'un procesu d'alcuentru y diálogu", aseguró, dexando tamién d'esta manera toles posibilidaes abiertes, incluyida la de ser él mesmu'l candidatu a sustituyir a Rajoy en La Moncloa.
Nos mesmu términos qu'Iglesias pronunciáronse los distintos voceros del so grupu confederal. "El PP gobierna pal PP y non pa España. Vamos pidi-y a les fuerces que caltienen al Gobiernu, al PSOE y Ciudadanos, que dexen de caltener al Gobiernu del PP", afirmó la vocera de Podemos, Irene Montero.
"Tamos viendo procesos de cangrena democrática y esto nun s'igua namás con comparecencies y pidimientos de más comparecencies nuna comisión d'investigación", aseguró'l voceru d'En Comú Podem, Xavier Domènech, quien yá-y treslladó la ufierta a ERC y PDeCAT.
"Hai una situación escepcional, d'esceición d'Estáu, tamos ante la obligación ética de sacar al PP del Gobiernu y de defender la democracia. Vamos facer tolo que tea na nuesa mano", recalcó'l líder d'IX, Alberto Garzón. "La sociedá demándanos acabar col focu de corrupción", esplicó de la mesma el voceru d'En Marea, Antón Gómez-Reino.
