UVIÉU, 25 Abr. (EUROPA PRESS) -
Esti xueves día 26 d'abril preséntase nel Teatru-Auditoriu de La Pola, en Siero, a les 20.00 hores, el llibru ganador del premiu Xuan María Acebal de poesía del Gobiernu d'Asturies, 'Little Babilonia', de Pablo X Suárez. L'actu va presentalu'l poeta y críticu Miguel Allende.
Nos 35 poemes de variada construcción y temática de 'Little Babilonia', Suárez tresmite una mirada crítica hacia lo cotidiano, siempre a partir de la tradición cultural d'occidente, pero ensin dexar de dar atención a los marxes, cerca de la contracultura.
El xuráu que-y otorgó a esti llibru'l Premiu Xuan María Acebal destacó "el nivel llingüísticu y estilísticu y la brillantez de les imaxes d'un testu que xuega y entemez la tradición más clásica coles referencies más pop".
Pablo X. Suárez nació n'Orviz, Siero, en 1981. Ye filólogu y especialista en llingua asturiana. Ceador de la Timba Poétika y poeta oral, tien publicaos n'asturianu los poemarios 'Asturian Beat' (2005) y 'El sistema débeme una chocolatina' (2011), amás del volume de relatos 'Yoni y yo'. Ye autor tamién de les obres en castellanu 'Pop retórika' (2010) y 'Cómo evitar el apocalipsis' (2016).
Pablo X. Suárez, el 'enfant terrible' de la lliteratura asturiana, llevaba cuasi siete años ensin publicar poesía n'asturianu, anque adelantara dellos poemes inéditos por antoloxíes o nos recitales nos qu'avezaba a participar, les Timbes poétikes qu'él entama y a les que punxo nome.
