UVIÉU, 31 d'Ochobre (EUROPA PRESS)
Los diputaos de la Xunta Xeneral del Principáu d'Asturies (XXPA) aprobaron por unanimidá una proposición non de llei del PP que pide la reconocencia del Parque Nacional de los Picos d'Europa como Patrimoniu de la Humanidá.
En concreto, la iniciativa pide al Gobiernu asturianu ellaborar la documentación y facer les xestiones oportunes ante l'Executivu central pa promover la candidatura de Picos d'Europa pa integrar la llista de llugares reconocíos pola Unesco como Patrimoniu de la Humanidá. Tamién se solicita que s'informe al parlamentu asturianu antes d'acabar la presente llexislatura de tolos trámites al respecto.
A pesar de que tolos grupos lo apoyaron, l'alderique nun tuvo llibre de crítiques ente los grupos. Dende'l PSOE, el diputáu Marcelino Marcos Líndez recordó al PP que'l Parque deféndese con "fechos" y recordó que'l Gobiernu central ta promoviendo una llei de parques que podría perxudicar a esti espaciu natural.
A xuiciu del PSOE nun ye de recibu dar un "mensaxe engañosu" a los ciudadanos y recordó la dificultá de llograr la reconocencia, puesto qu'España ye'l país con más espacios declaraos Patrimoniu de la Humanidá. En tou casu, esplicó que Cantabria y Castiella y Lleón tamién tienen coses que dicir nesti asuntu.
La diputada d'IU Emilia Vázquez criticó al PP por defender n'Asturies esta iniciativa mientres apoya a nivel nacional una llei de parques nacionales qu'amenorga les polítiques de caltenimientu, polo que dixo que los 'populares' nun son coherentes nesta materia.
Pela so parte, Juan Ramón Campo, de Foru, llamentó que naide s'acuerde de les persones que viven nel Parque de Picos d'Europa. Nesti sen, dixo que la declaración nun pue ser papel moyao y hai qu'evitar que perxudique a los habitantes d'esa zona.
