El Parlamentu Européu pide a los líderes que visiten a los presos políticos si acuden a la eurocopa

ESTRASBURGO (FRANCIA), 24 de Mayu (EUROPA PRESS)

El plenu del Parlamentu Européu reclamó a los líderes europeos que nun entamen visites oficiales a Ucrania y que, na midida de lo posible, visiten a los presos políticos nesti país si a lo último deciden acudir a la Eurocopa de Fútbol 2012. Coles mesmes, criticó l'usu selectivu de la xusticia contra los dirixentes opositores ucranianos, incluyida la ex primer ministra, Yulia Timoshenko.

Na so resolución, los eurodiputaos criticaron la decisión del Tribunal Supremu ucranianu d'aplazar l'apelación de Timoshenko contra la condena a siete años que-y impunxeron a últimos del añu pasáu por un delitu d'abusu de poder --en relación con unos acuerdos de gas ventaxosos pa Rusia firmaos nel 2009--, asina como'l retrasu de los procedimientos llegales nel so perxuiciu y l'usu de la fuerza per parte de los guardies de prisión mientres el so reciente treslláu a un centru médicu.

La Eurocámara recordó a Kiev que tien la obligación d'analizar les denuncies por presuntos tratos crueles contra Timoshenko y apoya l'envíu al país d'un equipu médicu que puea visitar a la ex primer ministra, lo mesmo que d'un grupu d'observadores d'altu nivel que van supervisar les siguientes etapes xudiciales nos dos procesos hasta agora abiertos na so contra, tal como se comprometieren les autoridaes ucranianes tres un acuerdu ente'l primer ministru, Mykola Azarov, y el presidente del Parlamentu Européu, Martin Schulz.

Coles mires d'investigar les posibles violaciones de los derechos fundamentales de Timoshenko y otros presos políticos de la oposición, los eurodiputaos reclamen que Kiev cree un panel internacional independiente, y que garantice en tolos casos asistencia médica fayadiza, accesu sin restricciones y el derechu a recibir visites a los presos políticos.