El Partido da Terra Eo-Navia propón dotar a la comarca d'un réxime xurídicu asemeyáu al del Valle d'Arán

Actualizado 27/02/2012 14:11:37 CET

UVIÉU, 27 de Febreru (EUROPA PRESS)

El partíu da Terra Eo-Navia, que va presentase a les próximes elecciones autonómiques pola circunscripción Occidental en defensa de los intereses de la comarca, anunció la so intención de promover un borrador de Lei Comarcal del Eo-Navia, basada na llei que regula la comarca catalana del Valle d'Arán.

El cabeza de llista de la candidatura comarcalista, Ánxel Suárez, indicó qu'anque'l so partíu nun llogrue entrar na Xunta, van presentar igualmente la propuesta de Llei per mediu d'una Iniciativa Lexislativa Popular, cola confianza de llograr les 10.000 firmes necesaries.

Caltienen que l'artículu 6 del Estatutu d'Autonomía del Gobiernu establez la organización territorial d'Asturies en conceyos y comarques, pero éstes últimes nunca se desarrollaron, afirma Suárez, "por cuenta de les polítiques urbanistes, centralizadores y anti-rurales de los socesivos Gobiernos".

Por ello, el Partido da Terra Eo-Navia considera necesario entamar un procesu pa fundir los casi vente conceyos que formen la comarca, algunos d'ellos n'aceleráu procesu de desertificación poblacional, nun solu Conceyu Comarcal con amplies competencies.

Estimen qu'esta midida implicaría un gran aforru en gastos alministrativos y una mayor disponibilidá de recursos pa ofrecer servicios conxuntos de calidá. La fusión de conceyos diría acompañada de la revitalización de parroquies como espacios pa la vida política per mediu de los conceyos abiertos, fórmula tradicional de democracia directa, asina como pola simplificación y reducción burocrática, estableciendo ventanes únicos pa tou tipu de trámites alministrativos nes actuales cabeces de conceyu.

COMPETENCIES

De forma asemeyada al Valle d'Arán, el Conceyu Comarcal tendría qu'asumir competencies y servicios n'árees como la enseñanza, cultura, sanidá, servicios sociales, ordenación del territoriu y urbanismu, turismu, protección, caltenimientu y alministración del so patrimoniu histórico y artístico, protección de la naturaleza, monte y víes forestales, agricultura, ganadería, pesca, caza, aprovechamientos forestales y estinción de quemes, mocedá, ociu y tiempu llibre, deportes, mediu ambiente, recoyida y reciclaxe de residuos sólidos, carreteres llocales, tresporte interior de viaxeros y artesanía.

En virtú de la Llei 1/1998, de 23 de marzu, el Conceyu Comarcal tamién tendría que tener competencia plena en tolo referente a la regulación, fomentu y enseñanza del gallego-asturianu o gallegu d'Asturies, que tendría carácter oficial nel territoriu.

El Partíu da Terra Eo-Navia va presentar el so programa esti xueves, y acabará nos próximos díes el procesu d'incorporación de propuestes de delles asociaciones y colectivos de tola comarca. Suárez indicó la so satisfacción "pola bona recepción de la candidatura" indicando que, independientemente del resultáu, "tornó nuna escelente plataforma pa debatir y repensar les posibilidaes pal desarrollu de la contorna dende una perspectiva tresversal y ecolóxica".

Esta web utiliza cookies propias y de terceros para analizar su navegación y ofrecerle un servicio más personalizado y publicidad acorde a sus intereses. Continuar navegando implica la aceptación de nuestra política de cookies -
Uso de cookies