UVIÉU/MADRID, 4 Ago. (EUROPA PRESS) -
El númberu de paraos rexistraos nel Principáu d'Asturies menguó en 2.671 persones en xunetu, hasta asitiase en 86.551 paraos. Nel conxuntu d'España, el paru menguó en 74.028 persones el mes pasáu, el mayor descensu nesti mes dende 1998, hasta los 4.046.276 paraos, según informó esti martes el Ministeriu d'Empléu y Seguridá Social.
La variación mensual relativa n'Asturies ye d'un -2,99%. D'esta miente, Asturies rexistra la segunda mayor mengua mensual del paru, per detrás de Galicia (-5,54%). La ciudá autónoma de Melilla tamién rexistra una mengua significativa, con un -3,85%. La variación media nacional foi en xunetu del -1,8% al respeutive del mes anterior.
Amás, la variación añal del paru n'Asturies ye d'un -6,32% en términos relativos, los que supón un rexistru de 5.836 paraos menos na comunidá autónoma.
Por sectores d'actividá, de los 86.551 paraos que se rexistren n'Asturies la mayoría asítiense nel sector servicios, con 58.197 paraos; darréu'l sector de la construcción, con 10.634 paraos y de persones ensin empléu anterior, con 8.588 paraos. Na industria, el númberu de paraos ye de 7.633 persones; y na agricultura'l paru cífrase en 1.499 paraos.
En cuanto al paru rexistráu según sexu y edá nel Principáu, siguen siendo les muyeres les más afectaes, con 46.172 paraes, tando'l paru masculín en 40.379 paraos. Mientres qu'ente menores de 25 años hai menos muyeres paraes qu'homes, con 3.078 desemplegaes frente a 3.471 paraos, la diferencia medra nes otres edaes yá que, de les 80.002 persones paraes mayores de 25 años, 43.094 son muyeres y 36.908 son homes.
Ente estranxeros, el desempléu n'Asturies asítiase en 5.980 persones con un descensu mensual de 281 paraos, que supon una variación relativa del -4,49%. En términos interañales, Asturies rexistró un descensu de 98 paraos (-1,61%) ente estranxeros.
SEIS MESES DE MENGÜES A NIVEL NACIONAL
Col recorte de xunetu, el paru encadena seis meses de mengües dempués de baxar en febreru, marzu, abril, mayu y xunu en 13.500, 60.200, 119.000, 118.000 y 94.727 paraos, respeutivamente. Amás, la cayida del paru rexistrada en xunetu d'esti añu foi más del doble de la d'esti mesmu mes l'añu pasáu, cuando amenorgó 29.841 persones.
Gracies a la llegada del branu y a los contratos de temporada, xunetu ye tradicionalmente un bon mes pal empléu. En tolos meses de xunetu dende l'entamu de la serie histórica, en 1996, baxó'l paru rexistráu, menos en 2005, cuando xubió en casi 14.557 paraos, y 2007, que rexistró una medría del desempléu en 4.469 persones. Nos últimos siete años, el paru rexistráu amenorgó en xunetu una media de 37.000 persones.
En términos desestacionalizaos, el paru rexistráu menguó en 44.286 persones nel mes de xunetu, el mayor amenorgamientu de la hestoria nel séptimu mes del añu.
El Departamentu que dirixe Fátima Báñez destacó que nos últimos doce meses, el desempléu amenorgó en 373.584, colo que la tasa interañal asitióse nel 8,5%.
El paru baxó en xunetu en tolos sectores económicos. El sector servicios foi'l que rexistró'l mayor recorte del paru, con 44.303 paraos menos (-1,65%), siguíu de la industria (-11.281 paraos, -2,82%), la construcción (-10.511, -2,25%), el colectivu de persones ensin empléu anterior (-5.608, -1,54%) y l'agricultura (-2.325, -1,15%).
El desempléu amenorgó en xunetu en 16 comunidaes autónomes, especialmente n'Andalucía (-19.319 paraos), Galicia (-12.691) y Cataluña (-9.162).
En xunetu rexistráronse 1.795.713 contratos, un 9,2% más que nesti mes de 2014, y el mayor númberu de contrataciones nun mes dende ochobre de 2007. La contratación indefinida medró un 8,56% al respeutive de la rexistrada va un añu, y la contratación indefinida a tiempu completu nun 10,07%.
El nuevu secretariu d'Estáu d'Empléu, Juan Pablo Riesgo, destacó que los datos de xunetu "demuestren que l'ameyoramientu del mercáu llaboral consolídase y inclusive s'intensifica".
