El paru n'Asturies baxa en 9.600 persones, un 8,7%, nel segundu trimestre

Servicio Público de Empleo de Asturias, paro,
EUROPA PRESS
Actualizado: jueves, 24 julio 2014 9:07


UVIÉU, 24 de Xunetu (EUROPA PRESS)

El paru baxó nel segundu trimestre del añu n'Asturies un 8,7%, al rexistrar 9.600 paraos menos que nel trimestre anterior, lo qu'eleva la cifra total de persones sin trabayu na rexón a 99.700, según la Encuesta de Población Activa (EPA) que publica esti xueves l'Institutu Nacional d'Estadística (INE).

La baxada rexistrada por Asturies, la cuarta mayor por comunidaes, ye superior al retrocesu mediu (5,2%, 310.400 persones menos), que, con tou, rexistró'l so mayor descensu trimestral de la serie histórica.

Tres esti recorte del desempléu, el númberu total de paraos n'España algamó la cifra de 5.622.900 persones, el so nivel más baxu dende'l 2006. Asina, la tasa de paru baxó casi 1,5 puntos nel segundu trimestre, hasta quedar nel 24,47%.

Nel últimu añu, el paru baxó un 7%, con 424.500 paraos menos, lo que, según l'INE, supón la mayor reducción añal dende 1999.

N'Asturies, la tasa de paru, un 21,02%, ye la octava más alta por comunidaes, y baxó más de cuatro puntos en comparanza col trimestre anterior.

En comparanza col mesmu periodu del 2013, el desempléu cayó en 18.400 persones n'Asturies, un 15,59% menos, casi nueve puntos superior al retrocesu mediu (7%, con 424.500 persones menos sin trabayu).

OCUPAOS

Ente abril y xunu d'esti añu, el númberu d'ocupaos asturianos quedó en 374.700, unos 3.600 más qu'al cabu del trimestre anterior, lo que supón una subida del 0,98%, perbaxo de la media (2,37%), al ganase n'España 402.400 puestos de trabayu, lo que dexa la población ocupada en 17,3 millones.

Amás, en comparanza col mesmu trimestre del 2013, el númberu d'ocupaos aumentó en 11.700 persones na rexón, un 3,23%, la quinta mayor subida por comunidaes, y más de dos puntos penriba del repique n'España (1,12% y 192.400 persones).

ACTIVOS

Pela so parte, la población activa n'Asturies baxó en 5.900 persones d'abril a xunu, al contabilizar 474.500, un 1,23% más que nel trimestre anterior, penriba de la subida media (0,4%).

Tamién en términos interañales baxó'l númberu d'activos (6.700 persones más), lo que supón una cayida del 1,39%, superior al retrocesu del 1% nel conxuntu del país.

HOMES Y MUYERES

De les 374.700 persones ocupaes n'Asturies, la mayoría, 197.500 yeren homes y les 177.300 restantes, muyeres. La tasa d'actividá de los primeres ye del 56,4% y la de les segundes del 46,9%. La tasa d'actividá media quedó nel 51,50%.

Sicasí, 48.900 de los 99.700 paraos yeren homes, con una tasa de paru del 21,02%, mientres que les muyeres en paru fueron 49.900, con una tasa de paru superior a la de los varones (21,97%).

Asturianu ofrecido por