Foto: Europa Press
UVIÉU, 2 de Febreru (EUROPA PRESS)
Asturies algamó la cifra de 96.607 paraos nel primer mes del 2012, al sumar 6.070 nuevos paraos en xineru al respsecto d'avientu, un 6,70 por cientu más.
Trátase del tercer mayor aumentu del desempléu de toles comunidaes, per detrás de País Vascu (7,2%) y Navarra (6,8%) y siguíu de Castiella y Lleón (5,4%) y la ciudá autónoma de Ceuta (5,82%).
N'España'l paru subió un 4 por cientu, al rexistrase 177.470 nueves persones sin trabayu, lo qu'eleva la cifra global a casi 4,6 millones, el nivel más altu en tola serie histórica comparable, qu'entama en 1996, según datos publicaos esti xueves pol Ministeriu d'Empléu y Seguridá Social.
En comparanza col mesmu mes del 2011, el desempléu repicó un 12,32 por cientu n'Asturies, al contabilizase 10.599 paraos más.
Amás, de les 96.607 persones que nun tienen empléu n'Asturies, 47.630 son homes y 48.977 muyeres. Por edaes, 9.396 son, amás, menores de 25 años.
En función de los sectores d'actividá, la peor parte lleváronla los servicios, que sumen en xineru 4.822 nuevos paraos n'Asturies, hasta quedar nos 62.742. sigue'l el sector de la construcción, que perdió nel últimu mes 723 empleos y suma yá 15.135; la industria, con 10.219 paraos (400 más); y l'agricultura, onde'l númberu de persones sin empléu ye de 1.299, en contabilizando 33 baxes l'últimu mes.
La subida del desempléu tamién afectó al colectivu d'estranxeros, con una subida en xineru del 3,78 por cientu sobre'l mes d'avientu, lo que se traduz en términos absolutos en 253 nuevos paraos. Con esti repique, la comunidá rexistra 6.950 estranxeros en paru, de los que 4.413 son estracomunitarios.
CONTRATACIÓN
L'añu 2012 estrenóse cola firma de 16.593 contratos, 2.051 menos que n'avientu (-11%), y 1.443 menos que n'igual mes del exerciciu anterior (-8%).
El gruesu de les firmes correspondieron a contratos temporales (15.306), mientres que namás los 1.287 restantes fueron contratos indefiníos.