Patronal y sindicatos firmen l'acuerdu sobre negociación colectiva

   Patronal y sindicatos soscribieron esti martes un acuerdu triañal (2010-2012) sobre negociación colectiva, que supón un mensaxe de "confianza" pa la economía española, y mostraron la so voluntá de siguir negociando nel ámbitu bipartitu p'algamar nuevos acuerdos que permitan meyorar la competitividá de les empreses y garantizar el caltenimientu y la creación d'emplegu.

   Asina lo certificaron en rueda prensa los presidentes de la CEOE y Cepyme, Gerardo Díaz Ferrán y Jesús Bárcenas, y los secretarios xenerales de CC.OO y UXT, Ignacio Fernández Toxo y Cándido Ménedez, los que chocaron les sos manes dempués de firmar l'acuerdu qu'afectará a unos doce millones de trabayadores.

   Concretamente, Díaz Ferrán aseguró que los axentes sociales "siguirán trabayando de manera billateral y cuando seya necesario tamién col Gobiernu", pa llograr una mayor flexibilidá interna de les empreses y avanzar en cuestiones como l'absentismu o'l trabayu a tiempu parcial. "Esti acuerdu debe ser un puxu y un incentivu pa que sigamos trabayando les dos partes", añadió, pa dexar cayer amás que "de siguío debe entamar una reforma llaboral".

   Los sindnicatos nun llegaron a mentar dicha reforma llaboral, anque coincidieron en que l'acuerdu debe sentar les bases de nueves negociaciones. El secretariu xeneral de CC.OO concretó que l'acuerdu naz cola "vocación" de qu'al traviés d'una negociación "demientres los próximos meses" puean tratase materies "sumamente trescendentes", como la salú y la seguridá nel trabayu, la igualdá y l'absentismu llaboral.

   De la mesma manera, Toxo apostó por realizar "tresformaciones necesaries", como "sostituyir la cultura del despido pola de la flexibilidá interna pa la conservación de los puestos de trabayu". Amás, indicó que ye la hora de desarrollar "lo primero posible" una reforma de la negociación colectiva, algo no que coincidió col cabezaleru d'UXT, que consideró que "hai puntos d'alcuentru" bastantes como pa realizala. De la mesma manera, Méndez consideró que "del acuerdu va derivase munchu trabayu", y debe ser un instrumentu de renovación.