Pelea nel Parlamentu ucranianu antes de votar la llei d'idiomes

KIEV, 25 de Mayu (EUROPA PRESS)

Parlamentarios opositores y gubernamentales enfrentáronse esti xueves nuna engarradiella poco antes del entamu de la votación d'un proyectu de llei que pretende la espansión del usu del idioma rusu nel país, según informó l'axencia rusa RIA Novosti.

Poco antes del entamu de la votación, parlamentarios opositores entraron nel edificiu y afalaron a un enfrentamientu con miembros del Partíu de les Rexones, de corte pro gubernamental. Tres ello, el presidente del Parlamentu, Volodimir Litvin, anunció'l fin de la sesión.

La oposición argumenta que'l proyectu namás va agravar les relaciones ente los ciudadanos de llingua rusa y los de llingua ucraniana. "Pidimos que'l Parlamentu nun debata un proyectu d'esti tipu, dao que podría provocar una quiebra na sociedá", dixo l'opositor Viacheslav Kirilenko, miembru del partíu La Nuestra Ucrania-Autodefensa del Pueblu.

Según la Constitución, l'ucranianu ye la única llingua oficial del país. Antes de la so victoria nes elecciones del 2010, el presidente ucranianu, Viktor Yanukovich, prometió tornar el rusu en llingua oficial, pero dende entós nun llogró la mayoría parlamentaria necesaria.

Ente'l 30 por cientu y el 50 por cientu de la población ucraniana tien el rusu como llingua materna por causa de los fondos llazos históricos y territoriales ente ambos países.