El pelotari que se fotografió con Otegi: "nun ye amigu míu nin fui a visitalu"

MADRID, 24 de Mayu (EUROPA PRESS)

El pelotari rioxanu y conceyal del Partíu Popular nel Conceyu de Logroño, Augusto Ibáñez Sacristán, 'Titín III', fotografiáu xunto al ex voceru de Batasuna Arnaldo Otegi mientres la so visita a la cárcel rioxana na qu'esti ta presu, aseguró que nin ye'l so "amigu" nin foi velu a él particularmente.

"Ye una semeya sacada de contestu, nun hai que da-y mas vueltes, hai qu'atayar el tema, y yo nin soi amigu d'Otegi nin fui visitalu a la cárcel, y nin quiero conocelo", recalcó nuna entrevista na cadena Cope, recoyida por Europa Press.

Según 'Titín III', la instantánea col líder de la izquierda abertzale prodúxose "dempués de faer un montón de semeyes". "Tocó-y a él con otros reclusos, ficimos la semeya y ayeri sáquenlo diciendo como que yo fuera visitar a Otegi, que yo tuviera con él, y como que yera'l mio amigu. Eso ye totalmente incierto", denunció.

Instituciones Penitenciaries yá emitió ayeri pela so parte un comunicáu nel qu'esplicaba que la visita d'Augusto Ibáñez Sacristán, 'Titín III', a la cárcel de Logroño debióse a razones humanitaries y nun s'entrevistó con Otegi.

"Llevo munchos años y munches xornaes diendo a un montón de sitios, a espardir la Pelota Vasca, esti deporte que ye tan nuestru. Llevo 19 años de profesional, prácticamente tolos años fuimos dellos pelotaris a facer xornaes colos presos, a firmar pelotes y a xugar algún partíu, y dempués facemos semeyes. Coincidió que l'añu pasáu cuando fuimos al centru taba Otegi", relató.

La semeya foi publicada na cuenta oficial de la rede social twitter del líder de la izquierda abertzale que xestiona'l so fíu, y según Prisiones, tomóse'l pasáu 2 d'avientu.