UVIÉU, 26 de Mayu (EUROPA PRESS)
La editorial Trabe vien de publicar la historia de 'Caricote', un cuentu infantil ya ilustráu de Carla Menéndez, que vien ser un llamáu a los neños contra l'aislamientu personal, y a que se relacionen, convivan y salgan a xugar a la cai "como facíamos antes".
Asina lo esplicó Carla Menéndez en declaraciones a Europa Press. Sabe bien de lo que fala como maestra nel colexu de Tremañes. Nesti centru lleven dellos años practicando l'aprendizaxe cooperativu, nel que los neños de cinco años faen de tutores de los trés en delles actividaes. La intención ye fomentar la interacción ente alumnos de diferentes edaes.
Influenciada por estes inquietudes, animóse a escribir y ellaborar la historia de 'Caricote', ilustrada como un 'collage' nel que les espines del perrucuspín protagonista tán feches con cerilles.
Caricote ye un perrucuspín que siempre ta solu, hasta qu'un día máncase con unos escayos y, pola lesión, tien que pasar munchu tiempu na so madriguera". "Y ve que tar solu nun ye tan prestoso", esplica l'autora. Entós, otros perrucuspinos acuden con agua y fueyes de menta pa cura-y la pata. Y entós entama barruntar que ll'aislamientu nun ye tan bono y qu'igual la compañía nun ta de más, inclusive pa facer arrollones peles cuestes del pueblu.
Menéndez trata de treslladar a los neños "la necesidá de tener relación social, porque siempre t'acuerdes de los demás nos momentos malos". "La importancia de tener amigos y de relacionase", son aspectos que l'autora ve necesario fomentar nestos tiempos, onde "munchos neños pasen el día 'a su bola' colos móviles, sin salir a xugar a la cai, a la pelota, y a los típicos xuegos de antes".
El llibru ta dedicáu a los compañeros de trabayu de Carla Menéndez na escuela de Tremañes, y especialmente a Covadonga Iglesias, 'Covi', finada va poques selmanes.
