Na esploración médica'l neñu tenía mancadures en delles zones del so cuerpu por cuenta de los malos tratos
UVIÉU, 1 Oct. (EUROPA PRESS) -
La Fiscalía del Principáu d'Asturies solicita penes de prisión, retirada de la patria potestá y alloñamientu pa una acusada de mancar al so fíu d'un añu y cuatro meses n'Uviéu. La vista oral va celebrase mañana, 2 d'ochobre de 2014, nel Xulgáu de lo Penal númberu cuatro d'Uviéu, a les 11,00 hores.
El Ministeriu Fiscal sostién que l'acusada, na tarde nueche del 6 de xunu de 2013, na casa familiar que comparte con so pá n'Uviéu, pegó al so fíu, d'un añu y cuatro meses d'edá, y/o-y torció los miembros inferiores, causándo-y quebra epifisiólisis grau II proximal de la tibia drecha y quiebra espirodea de la tibia izquierda.
El menor tardó en curar 60 díes, 10 de los cualos tuvo hospitalizáu. Nun-y quedaron secueles agora, anque esiste riesgu de afectación futura na crecedera d'una de les sos tibies.
Na esploración que se prauticó al neñu'l 9 de xunu de 2013 nel serviciu de Maternidá del HUCA, viéronse-y hematomes en dambos cartílagos de los pabellones auriculares, ún d'amenorgaes dimensiones y otru en fase de cicatrización, asina como na cara, que podríen obedecer a impresiones dixitales.
El mélicu forense reparó en dos equimosis nel costazu derechu y otra nel llombu, más antigües que les de la cara, toes elles de naturaleza traumática, ensin que tea acreditao quién foi l'autor de les mesmes, nin la forma y circunstancies en que se ficieron.
El 13 de xunu de 2013, el Xulgáu d'Instrucción númberu tres d'Uviéu dictó un autu pol que se prohibió a l'acusada averase al so fíu, la so casa, o cualesquier nel que s'atope a menos de 500 metros, asina como comunicase con él per cualesquier mediu o procedimientu.
Alcordóse igualmente la suspensión cautelar de la guarda y custodia del menor, otorgándose la mesma cautelarmente a los servicios sociales de la Conseyería de Bienestar Social y Vivienda del Principáu d'Asturies. Nel momentu de redautase l'escritu d'acusación de la Fiscalía, el menor atopábase acoyíu por una familia del Programa d'Acoyimientu de Families Canguru de Cruz Roja Española.
La Fiscalía considera que los fechos son constitutivos d'un delitu de mancadures de los artículos 147.1 y 148.3º del Códigu Penal, col agravante de parentescu, y solicita que se condergue a l'acusada a 3 años y 9 meses de prisión, inhabilitación pal exerciciu de la patria potestá nesi mesmu espaciu de tiempu y prohibición d'averase al so fíu a una distancia inferior a 500 metros y de comunicar con él per cualesquier mediu en 5 años.
El Ministeriu Fiscal solicita igualmente que se caltenga la vixencia de les midíes provisionales alcordaes pol Xulgáu d'Instrucción hasta que se dicte'l resolvimientu que ponga fin a esti procedimientu.
Por vía de responsabilidá civil l'acusada va indemnizar al menor con 3.460 euros poles mancadures, más los intereses llegales, y al SESPA na cantidá qu'acreite n'execución de sentencia pola atención emprestada al neñu.
