Foto: EUROPA PRESS
UVIÉU, 01 de Febreru (EUROPA PRESS)
La publicación La Sidra solicitó al Conceyu de Xixón que se recueya espresamente como escepción na "ordenanza del 'botellón'", el consumu de sidra en llugares públicos, puesto que "ésti siempre foi tradicional na nuesa ciudá, igual que nel conxuntu del país, y nunca dio llugar a los problemes que se-y achacaron al botellón'".
Al traviés d'una nota prensa, la revista considera que "nun puede considerase en nengún casu como un problema de salú pública, sinón como espresión de la nuesa ancestral cultura sidrera que non sólo tien que protexese y respetase, sinón incentivase na midida de lo posible".
La Sidra entiende que "el conceyal de seguridá ciudadana, l'actual borrador tomó como referencia les ordenances de ciudaes como Barcelona y tamién un testu marco de la Federación Española de Conceyos y Provincies (FEMP), y entiende que por eso nun recueye la singularidá de la sidra, pero considera que nun se trata de facer una vez más un calcu de disposiciones españoles n'Asturies, sinón d'adaptales a la nuesa realidá sociocultural".
Pa esta publicación, "resultaría llamentable que de resultes de les disposiciones pa controlar la costume foriata del botellón, en función de los problemes de sanidá pública que se-y atribúin, acabe perxudicándose una de les nueses espresiones culturales más auténtiques".