El piragüista Manuel Busto considera una "vergüenza" la concesión del premiu Príncipe de los Deportes a Olazábal

UVIÉU, 19 de Xunu (EUROPA PRESS)

El piragüista Manuel Busto, diez veces campeón del mundu na especialidá de maratón, calificó güei de "vergüenza" la elección del xuráu del Premiu Príncipe d'Asturies de los Deportes, qu'esti añu foi golfista José María Olazábal.

"Nun lo pueo creer. En primer llugar tolos mios respetos y la mio norabona a Chema Olazábal. Pero,¡¡¡Qué vergüenza'l Premiu Príncipe d'Asturies de los Deportes!!!. Cada añu supérense, nun sé si son responsables la Fundación o los miembros del Xuráu", escribió Busto na so cuenta de Facebook.

Según Busto, l'abanicu de candidatos d'esti añu yera d'un "altísimu nivel". En reconociendo que les sos conocencies de golf nun son mui amplies, consideró qu'Olazabal nun s'alcuentra ente los diez meyores golfistes de la historia, y cree que probablemente fuera'l candidatu con menos méritos.

"Por afinidá y por piragüista David Cal axunta munchos mas méritos qu'Olazábal pa facese merecedor del premiu, y yá nun digo nada de Teresa Perales que quedo finalista, too un exemplu de superación y un palmares comparable col nadador estaounidense Michael Phelps, no que cinca a medayes olímpiques", apuntó'l piragüista asturianu.

Almitió que ye bien difícil comparar deportistes de distintes disciplines, pero dixo que si ún llee los argumentos del xuráu sobre los méritos d'Olazabal, el premiu nun aguana la comparación con Teresa Perales. "Por favor señores seyamos serios", acaba pidiendo.

CHECHU RUBIERA

Otru conocíu deportista asturianu, el ciclista Chechu Rubiera mostró tamién les sos dudes al conocer la elección del premiáu esti añu. "Anque supongo que los miembros del xuráu van tener más elementos de xuiciu que yo", matizó.

Sicasí, Rubiera tien la sensación de que'l xuráu del Premiu Príncipe d'Asturies de los Deportes busca "lo mediático", sin entrar a valorar los méritos humanos y sin acordase de xente que nun ye tan conocida, pero que tien un enorme méritu nel mundu del deporte.